Larsap leh engineer zirlaite an inkâwm

Governor Gen. Dr Vijay Kumar Singh chuan nimin khan Lok Bhavan-ah New India Mission hnuaia internship programme hmang mek Indian Institute of Technology (IIT), Madras zirlai 11 leh National Institute of Technology (NIT), Mizoram zirlai 21 te a kâwm a; Mizoramah hun nuam tak hmang turin duhsakna a hlan.

Gen. VK Singh chuan, New India Mission internship programme chu hmalakna ṭha a nih thu sawiin, "Hemi kaltlang hian engineering zirlai, ngaihtuahna hrang hrang neite thiamna leh theihna thawh khawm hmanga mipui harsatna sutkian tum a ni," a ti a; IIT-Madras chuan India ram tan hna ropui tak tak a lo thawk tawh tih sawiin, thingtlang mite harsatna zir chiang a, chinfel theih dan tur NIT-Mizoram nen an ngaihtuah tur chu lawmawm a tih thu a sawi.

Mizoram chu agriculture sector-a innghat a nih thu Larsap chuan a sawi a; hlâwk zawka thlai thar te, sawngbawlna leh hralhna lamah hmasawnna a awm theih nan ngaihtuahna sêng tur te, thingtlanga chengte harsatna ngun taka zir a, puih theih dan tur ruahmanna ṭha zawk duan chhuah tum turitein a chah a ni.

Inkawmhonaah hian NIT-Mizoram dean Dr Sukanta Roy chuan New India internship programme kalphung leh hun hman dan turte a sawifiah a; Larsap hnenah hian zirlaite chuan Mizorama an vah velnaa an thil hmuh tawh leh tawnhriatte an sawi bawk.

New India Mission Internship Programme hi December 16, 2025 khan ṭan a ni a, January 10, 2026 thleng a awh dawn. Zirlai 32-te hian Mizorama khaw hrang hrang tlawhin, kawlphetha, tui, hriselna leh loneih kaihhnawiha harsatna awmte zir chiangin, chinfel dan kawng an zawng dawn a ni.