Mizorama kawngpui ṭha hmarchhak state-te'n an chhawr dawn - Duhoma

Ministry of DoNER hnuaia High Level Task Force on Infrastructure Connectivity & Logistic Cost chu nimin khan online-in an ṭhukhawm a, chief minister Lalduhoma a tel. Lalduhoma chuan, Mizoram khawchhak lam leh khawthlang lamah inkalpawhna kawngpui ṭha a awm chuan hmarchhak state-te'n an chhawr dawn thu a sawi.

CM Lalduhoma chuan, Mizoram chu Asia chhimchhak ramte nena intlawhpawhna hmatáwngah a awm thu sawiin, "Kaladan Multi Modal Transit Transport Project kan tihhlawhtlin vat a ngai. Sairang thlengin rél a lo lut tawh a, Mizoram chhim lam a thlen phei vat a ngai a, Zorinpui thlengin national highway ṭha tak kan neih a ṭul. Mizoram khawchhak lam leh khawthlang lam inkalpawhna kawngpui ṭha kan neih hian hmarchhak bialin kan chhawr dawn a ni," a ti.

Sairang leh Lawngtlai chu multi-modal hub atan siam theih a nih thu sawiin Chief Minister chuan, "Kan kawngpuite hi fûrpui laka him ni turin concrete-in siam thei ila a ṭha berin a lang," a ti a; hmarchhak state-a inkalpawhna ṭha leh man tlawm zawk neihna tura rawtnate a sawi bawk.

High Level Task Force on Infrastructure Connectivity & Logistic Cost ṭhutkhawm hi convener Manik Saha, Tripura chief minister-in a kaihruai a; Mizoram aṭangin CM secretary Vanlaldina Fanai leh Planning department hotute pawh an tel. Task Force hian final report an siam hnai tawh a ni.