Lunglei, Champhai, Mamit & Saitualah Geriatric caregiver course hawng dawn

Mission Foundation Movement (MFM) hnuaia Regional Resource Training Centre (RRTC) for Senior Citizens chuan nimin khan Lunglei Convention Centre-ah upate pualin 'Workshop on Elderly Issues' an buatsaih. Khuallian Social Welfare minister Lalrinpuii chuan, kum tharah Lunglei, Champhai, Mamit leh Saitualah upate enkawl zirna, geriatric caregiver course hawn a nih dawn thu a sawi.

Lalrinpuii chuan, tun hma deuhah chuan Mizo zingah kum 60 pêl an tam lo a, tunah chuan kum 80 chung lam an tam tawh thu a sawi a; sorkarin upate a ngaih pawimawh thu sawiin, "Sorkar chuan sum leh paia ṭanpui mai piah lamah, khawtlangah kum upate dikna leh chanvo a humhalhsak zel dawn. Kum tharah Lunglei, Saitual, Champhai leh Mamitah geriatric caregiver course hawn a ni dawn a, upa enkawl lai nei mekte duhsak an ni ang," a ti.

Zirhonaah hian Lunglei hrang hranga Mizo Upa Pawl unit 24 aṭangin mi 267 an tel a; MFM executive director Lalramchuanzela'n RRTC hmalaknate a sawi. MFM School of Nursing principal Christina Zothanpuii'n 'Health & wellness' tih thupui a sawi a, fitness trainer C Lalremsiama leh Laithangpuii College of Pharmacy aṭangin Lalrempuii ten taksa sawizawi dan leh damdawi ṭha leh ei dan tur dik an zirtir bawk.