College building tihchangtlunna turah MLA-te'n tender chhuah nawn an rawt

Mizoram Legislative Assembly-a Committee on Petitions member R Rohmingliana chuan nimin khan speaker Lalbiakzama hnenah 'Third Report of Committee on Petitions relating to Higher & Technical Education Department' a hlan a; report-ah hian tender chhuah nawn rawt a ni.

HTE department chungchanga Committee on Petitions report-ah hian PM-USHA hnuaia Aizawl College, Hrangbana College, Johnson College, Zirtiri Residential Science College, Institute of Advance Studies in Education, Aizawl North College leh T Romana College puala Rs 75,79,271.18 hmanga hna thawh tur te, Lunglei College leh J Buana College puala PM-USHA hnuaia Rs 8,73,64,131.00 hu hna thawh tur leh, ‘Construction of Various assets in Govt. Colleges at Lunglei District’ (PM-USHA/GIEI/01 of 2025-2026) hnuaia Rs 8,73,64,131 hu leh, Lawngtlai College puala Rs 4,24,77,199 senga zirna-in cheiṭhatnaa hna thawk tur tender chhuah tawh chungchanga petition lut kaihhnawih tarlan a ni.

Committee on Petitions hian PM-USHA hnuaia zirna-in tihhmasawnna tura hna thawktu tur thlan chungchanga petition lut an zirchiannaah thil fel tawk lo a awm avangin tender chhuah ṭha leh (re-tender) turin rawtna (recommendation) a siam. Zirna-in hmasawnna tur leh mipui náwlpui hamṭhatna tur buaipuinaah theihtawp chhuah zel turin sorkar thuneitute duhsakna a hlan bawk.

‘Third Report of Committee on Petitions relating to Higher & Technical Education Department’ petition buaipui a nih lai hian Committee on Petition chairman chu T Lalhlimpuia a ni a; member-te chu Dr Lorrain Lalpekliana Chinzah, H Lalzirliana, R Rohmingliana, Prova Chakma leh Jeje Lalpekhlua te an ni.