NQAS-ah damdawi-in 3 an tling thar

Serchhip District Hospital leh primary health centre pahnih - Zawlnuam PHC leh Thingsai PHC te chu India rama sorkar damdawi-in ṭha tehna, National Quality Assurance Standards (NQAS)-ah an tling thar.

National Health Mission, Mizoram mission director Dr Lily Chhakchhuak tarlan danin, NQAS hmu thar Serchhip District Hospital hian tehnaah 93.73% a hmu a; Zawlnuam PHC-in 92.63% hmuin, Thingsai PHC 91.60% a hmu bawk.

Serchhip District Hospital hi India rama nau neihna hmun ṭha bik tehna, LaQshya-ah a tling thar bawk a; tehnaah Maternity OT chuan 94.95% hmuin, Labour Room chuan 94.12% a hmu a, platinum badge an dawng.

Heti hian Mizorama sorkar damdawi-in 60-te’n NQAS national certificate an hmu tawh a; heng bakah hian sorkar damdawi-in 13 leh health and wellness centre 42-in NQAS state certificate nei tawhin, national certificate hmu turin endik an dil mek a ni.