KHAWTHLIR

Lok Bhavan tlawh theih dawn

Governor chenna Lok Bhavan chu Krismas leh kum thar lo thleng turah mipui tlawh theiha hawn a ni dawn. Lok Bhavan hi December 24-26, 2025 leh January 1-3, 2026 chhungin a duh apiang tlawh theiha hawn a ni dawn a, chawhma dar 10 aṭanga tlai dar 4 thleng hawn ṭhin a ni ang.

Tuialhthei dan loa zawrh khap

Aizawl district magistrate Lalhriatpuia chuan thupek chhuahin, Aizawl district-ah phalna nei loa petrol leh diesel zawrh khap a nih thu a tarlang. Thupek zâwm loa petrol/diesel zuar luite chu mansak an nih dawn thu leh, dan hmanga hrem theih an nih thu a tarlang bawk.

Board member ruat

Sorkar laipuia Ministry of Rural Development chuan Official Language Advisory Board member atan Dr Kathy Rohlupuii, Tuithiang, Aizawl a ruat a, India hmarchhak state aṭanga ruat awm chhun a ni. Dr Kathy Rohlupuii hi Aizawl College-a Hindi department-ah assistant professor a ni.

Minister-in tlawh

Home minister K Sapdanga chuan nimin khan 1st MAP hmunpui, Armed Venga mi a tlawh a, an hnathawh dan leh mamawhte a enfiah. Minister chuan, police-in hma an sawn zel theihna atan theihtawp an chhuah zel dawn thu a sawi.

Chhawmdâwlna sem

Maruti Suzuki Jimny nei intel khawm, Mizoram Jimny Club chuan chhawmdawlna atana sum an thawh khawm Rs 1,37,000 chu nimin khan an sem. Ṭanpuina hi Ṭawngṭai Bethel Camping Centre-ah Rs 87,000 an pe a, Lunglei leh Champhaiah an sem bawk.

Kawng khâr dawn

Aizawl Traffic SP C Vanlalvena chuan thupek tichhuakin, Selesih huam chhungah kawng siam a nih dawn avangin Durtlang Leitan leh Sihphir inkar kawngpui chu January 3, 2026 thleng khâr a nih dawn thu a tarlang. Sihphir lam pan turte chu CVScAH complex chhungah kal tur a ni a; Sihphir lam aṭanga Durtlang/Aizawl lam pan turte chu Selesih-Ṭhuampui kawngah kal tur a ni.