Krismas parade buatsaih a ni dawn - Tourism Minister

Tourism minister Lalnghinglova Hmar chuan nimin khan a pisaah thuthar thehdarhtute a kâwm a; vawiin hian Tourism department bultumin Aizawlah Christmas Parade buatsaih a nih dawn thu sawiin, a duh apiang tel turin mipui a sawm.

Lalnghinglova Hmar chuan, Christmas Parade chu Chanmari-a Ch Saprawnga building kawt aṭangin chhun dar 12-ah ṭan a ni dawn a, Lammualah luh khawm tur a nih thu a sawi a, "Kawng lakah zaithiamte zaina hmun tur buatsaih a ni dawn. Krismas lam kaihhnawih thawmhnaw inbelin a duh apiang a tel theih. Krismas lam hawi kaihhnawih thawmhnaw nei lo tan pawh kal theih vek tho a ni," a ti.

Christmas Parade chu Mizo mipuite'n bul an ṭan phawt dawn thu sawiin Tourism Minister chuan, "Kum dangah chuan hnam dangte'n kan ti ṭhin tih an hria ang a, min rawn telpui kan beisei," a ti a; tourism lama hmasawn tur chuan khualzinte an rawn kal châk chhan tur siam a ngaih thu a sawi.