Mizoram sorkar Health & Family Welfare Department-a thawk mek sorkar doctor 452 zinga 347-in Non Practising Allowance (NPA) an la a, doctor 105-in NPA An la lo

 December 29, 2025-a CMO Conference Hall-a chief minister Lalduhoma kaihhruaiin Mizoram Resource Mobilisation Committee an thukhawm. April 23, 2024-a an lo rel tawh, Mizoram sorkar doctor-te'n NPA la chunga private practice an awm chuan tihtawp ni se, tia thutlukna an lo siam tawh bawhzuina an thlirho.

Thutkhawma tarlan danin, HFW Department-in report a thehluh dan chuan, Mizoram sorkar doctor 452 an awm mek a, chung zinga 347 chuan NPA lain, doctor 105 chuan an la lo. NPA la chunga private practice an awm lo tih tarlan a ni.

Mizoram Health Services Rules, 2009 behchhana Mizoram Gazette Notification February 18, 2010 leh December 18, 2024 Amendment chuan sorkar doctor (non clinical) private practice-te chu NPA an lak a khap a, private practice turte pawhin phalna an lak a ngai. Meeting-ah hian NPA chungchang bawhzui zel dan tur duan a ni.

Meeting-ah hian Aizawla sumdawnna kalpuitu GST registration nei thei tura ngaih, registration la nei si lote zawn chhuah hna Aizawl City Local Council Association nena tang tlanga thawh an rel a; Taxation bawhzui turin an dah.

Taxation official-te'n raid/verification an neih changa invenna atana silai (arms) eng emaw kawl an dilna chu central sorkar leh state dangte tih dan angin, a tul hunah home department nena thawh dun dan lo ngaihtuah thin se, an ti.

MRMC hian Administrative Reform Commission 2019 in file-in officer dawhkan pali chauh kal tlang tura rawtna an lo siam tawh chu tlema her rem deuhin department thenkhata enchhin turin DPAR lama thlen an rel. Ruahman dan chuan Department pakhatah Under Secretary a awm chuan Deputy Secretary awm lo se, Deputy Secretary zawk a awm chuan Under Secretary awm lo se; Department pakhatah Joint Secretary a awm chuan Addl. Secretary awm lo se, Addl. Secretary zawk a awm a tul chuan Joint Secretary awm lo se, tih a ni. Kalpui chhinna tur department chu DPAR-in an ruahman ang.

Importer & Exporter Licence holder-te'n KMMTTP kaltlanga bungraw che vela chhiah pek a nih leh nih loh endik hna thawh dan tur rawtna an thlen chu zir chian ni se, an ti a; Secretariat-a e-office kalpui a nih hnua a nghawngte zir chian ni se, an ti bawk.