Thudik lo thehluh vangin Police-in mi 1 man, 5-in interim bail nei hman
James Zoliana, Kanhmun, Samtlanga awm mek chuan December 1, 2025 khan Aizawl SP-ah FIR register tura ngenna leh tanpui dilna a thehlut a, mahse, thudik lo a ni tih hriat chhuah a nih avangin Police ten an man a, he thila inhnamhnawih midang panga chuan Court atanga interim bail an lo neih hman avangin man an la ni lo a, man theih an nih veleh man nghal an ni dawn.
Aizawl SP Zosangliana tarlan danin, James Zoliana hian a lehkhaa a ziah dan chuan November 20, 2025 chhun dar 11:30 vel khan a hmelhriat Anthony-a chu ram leina tur pawisa kentirin an khaw pa Micky-a nen Falkland-ah an in hmu a, an pahnih hian World Bank Road, Trinity Hospital an thlen phei hma deuhin car pakhat Maruti Suzuki Fronx Regn. No MZ-01AE-1459 a mipa pakhat leh hmeichhe pahnih chuangte nen inhmu in, an inhmuh hnu lawk chuan bullet bike Trinity Hospital lam atanga lo phei chu an piah deuhah dingin he bike a chuang mipa pahnih Police Uniform hate chuan lo pan in 'kan zawn lai in ni' tiin an dap nghal a, he ta an pawisa ken Rs 17,40,000 chu an chhuh lui a ni.
He thil thleng chungchang hi uluk tak leh fimkhur takin ASI Thangkima, Kulikawn Police Station chuan a chhuizui a, Kulikawn Police Station-ah FIR a thehlut a, FIR-a a lan dan chuan November 19, 2025 khan complaint thehluttu James Zoliana leh a thurualpui hnam dang mi pahnih - Abdul leh Debu tia a hriatte nen damdawi (Methamphemamine) lei turin Aizawl an rawn kal a, Hotel Spice Corner, Falkland+ah thlengin damdawi lei dan tur leh inpek dan tur an rel ho a ni.
November 20, 2025-ah damdawi lei turin Anthony-a chu an tir a, damdawi lei tura an indawr laiin bike-a rawn kal mi pahnih Police nia rin (pakhat zawk chuan jacket uk a ha) te chuan 'kan mi zawn lai in ni' tiin a kalpui pa Micky-a chu an zawn lai anih thu an sawi a; Anthony-a erawh chu an haw tir.
A hnuah car a rawn chuang mi pathum leh Micky-a leh bike a rawn kal mi pahnih, an vaiin mi parukte chuan Rs 17,40,000 hi an in sem ta a ni. James Zoliana hian heng hnam dang mi pahnihte hi Rs 50,000 hlawhin a rawn hruai thu a sawi.
James Zoliana hi Police hnenah thu dik lo a thehluh avangin man a ni a; inhnamhnawih midanh panga pawh hriat an ni tawh a, Court atangin interim bail an lo neih hman avangin man an la ni lova, man theih an nih veleh man nghal an ni ang.
Mi pakhat Excise & Narcotics mi leh sa nia chhal Hriatpuia tia hriat hi a nihna dik tak hriat ala ni loa, chhuizui mek a ni.
INTERIM BAIL LA TE:
(i) Lalthlamuani d/o Lalfaka, Electric Veng, Aizawl
(ii) Lalmalsawmkimi d/o Nuchhungi, Armed Veng South, Aizawl
(iii) Lalhmunmawia h/o Lalrinsangi, ITI Vengthar, Aizawl
(iv) Lalremruata s/o Ramengmawia, Chaltlang, Aizawl
(v) Micky Lalmuanpuia s/o Vanlalsawma (L), Edenthar, Aizawl.