Thlasik laia mipui himna tur tichhuak

National Programme on Climate Change and Human Health (NPCCHH) chuan khaw vâwt chho mekah mipui himna tur leh zawm tur a tichhuak a; khawchin hriat nan chanchin thar ngaithla uar tur leh mausam.imd.gov.in/ emaw, bit.ly/IMDcoldwave emawahte en ṭhin turin a chah.

NPCCHH chuan, khawchin chungchanga thuchhuah leh thutharte ngaichang a, rîkrum thila tih tur pawimawh an sawite chîk taka ngaichanga zawm ngaite zawm turin mi tin a ngen a, "Thli vâwt laka him nan a tam thei ang ber in chhungah awm tur a ni a, thawmhnaw lum thâwl lam deuh hâk thuah a, zâng lam deuh leh windproof, wool lum ṭha tak hâk tur. Thawmhnaw tâwt lutuk hâk loh tur," a ti.

Taksa huh leh hnâwnga awm lo tur te, lu, nghâwng, kut leh ke te kim taka khuh ṭhat tur a nih thute tarlangin NPCCHH chuan, "Kut tuam lum ṭhat tur a ni a, lukhum leh nghawng awrh (muffler)-te hman ṭhat tur. Pheikhawk lum leh tui lut thei lo (waterproof) bun tur a ni. Chaw ṭha leh hrisel lam ei uar tur a ni a, natna dotu khawl tichak thei tur thei leh thlai hring lam (Vitamin-C tamna) eitur a ni," a ti a; in tur sa (hot drinks) lam leh tuilum in ṭhat a ṭul thu a tarlang.

NPCCHH chuan vun leh taksa a ro loh nan oil, body cream leh lotion-te inhnawih ṭhat a pawimawh thu te, kum upa lamte ngaihsak a ṭul thu te, ṭhenawm khawvengah kum upa lam leh mahnia khawsate an hriselna a ṭha em tih ena tlawh ṭhin tur leh ni tin mamawh leh ṭul dangte chhekkhawl a pawimawh thute a tarlang bawk.