Aizawl boruak a bawlhhlawh tial tial - MPCB

Mizoram Pollution Control Board (MPCB) chuan thuchhuah siamin, Aizawl khawpui boruak chu a kum têla a bawlhhlawh tial tial thu an tarlang.

MPCB chuan, boruak dinhmun an enfiahna khawlpui, Sikulpuikawna real time data hmuh theihna chu central lamah khawl a chian loh avangin December 31, 2025 zanlai aṭanga January 1 data an hre thei lo tih an tarlang a, "January 2 chhun dar 12 vel khan Aizawl AQI (Air Quality Index) chu 80 a ni a, hei hi halpuah hâl aṭanga darkar 36 hnu a ni. Halpuah hal hma December 31 tlai dar 4-ah chuan AQI chu 38 a ni a, heta ṭanga a lan danin, AQI hi a lêt hnih chuang (210%) hretin a pung a ni," an ti.

Data-a a lan danin, boruaka bawlhhlawh sîn tê bik, particulate matter 2.5 micron (PM2.5) chu Aizawlah a pung chho nasa tih tarlangin MPCB chuan, "December thla bikah kum 2024 khan PM2.5 hi chawhrualin 19 µg/m³ chauh a nih laiin, kum 2025-ah chuan 38 µg/m³ a kai chho tawh a, a lêtin a pung tihna a ni," an ti a; PM2.5 chu chuapa lut awlsam, paih chhuah leh theih si loa táng ta tlat ṭhin a nih avangin a pawi zual tih an tarlang.

MPCB chuan, kumtluana boruak dinhmun thlirin Aizawl khawpui boruak chu a kum têlin a letin a bawlhhlawh tial tial tih data aṭangin a lan thu an tarlang a, "Boruak tibawlhhlawh thei thil hâl lo tura mimal, pawl leh sorkar pawhin ṭan kan lak deuh deuh a pawimawh. Kan hriselna hi kan thupui ber ni ṭheuh se a duhawm hle a ni," an ti.