Tualthattu ni ngeia hriat jail-ah dah

December 31, 2025 zana K Vanlalngaii (78) w/o Lawmthanga (L), Lunglei Bazar Veng thattu nia hriat Johny Rosangliana (41) s/o J Vanlalchhunga, Lunglei Bazar Veng chu man a nih hnuah Lunglei District Jail-ah dah a ni.

Lunglei SP J Lalmuankima chuan January 2, 2025 khan a pisaah thuthar thehdarhtute kâwmin, K Vanlalngaii tualthihna police-te'n an chhui dan leh Johny Rosangliana man a nih dan a sawifiah a, "Chhui zui ngaite chhui mek zel a ni," a ti.

Lunglei SP sawi danin, December 31, 2025 zan 9:30 khan Lunglei Bazar Vengah K Vanlalngaii thia hmuh a nih thu Lunglei Police Station-in an dawng a; police-te'n thil thlenna hmun hi an pan nghal a, tih tur ṭulte an ti nghal. K Vanlalngaii chu chhuatah a lo mu a, a lu lam chu ṭhutphahah a lo innghat a ni.

Vanlalngaii hian Bazar Veng Anganwadi Centre hnuai a luah a, amah chauhin a khawsa. Mi kut tuar ni ngeia hriat a nih avangin finfiahna awm theite dap a ni a, mahse, pawikhawihtuin hnuhma hnutchhiah a nei mumal lo.

Special Investigation Team (SIT) din nghal a ni a, SIT chuan January 1, 2026 zan dar 9 khan pawi khawihtu nia hriat Johny Rosangliana an man. Thu zawhfiah a ni hnuah Johny Rosangliana chuan a tih a nih thu police hmaah a puang a; January 2 khan court-ah hruai a nih hnuah jail-ah dah luh a ni.

K Vanlalngaii hi December 31, 2025 zan dar 9 vel khan a fate, Lunglei Luangmuala chengte chuan tlawh an tum a, thiin an hmu a ni.