IIMC-ah PhD zirna hawn a ni

Ministry of Information & Broadcasting hnuaia Indian Institute of Mass Communication (IIMC)-ah kumin 2026 aṭang hian PhD zirna hawn thar a ni a; Mizoram University campus-a IIMC North East Regional campus-ah pawh January 1, 2026 aṭangin full time leh part time-a PhD zirna kalpui ṭan a ni.

IIMC-a PhD zir tur hian January chhungin dilna thehluh theih a ni a; UGC NET nei tan interview tur niin, NET nei lo tan written exam leh interview a ngai.

IIMC hmunpui chu Delhi-ah a awm a, India ramah regional campus panga a awm. MZU campus-ah North East Regional Campus a awm a; Aizawl campus bikah hian Post Graduate Diploma in English Journalism zirlai 20 leh Master in New Media Communications zirlai 14 an awm mek a, an vaiin Mizoram páwn lam mi vek an ni.