KHAWTHLIR

CM leh Mizo IFS

Chief minister Lalduhoma chuan December 29, 2025 khan a pisaah Mizoram tlawha lo zin Mizo IFS officer Malsawmthanga Keivom, Djibouti-a India ram palai (ambassador) ni mek a kâwm. CM hian Mizoram a rawn tlawh avangin lawmthu a lo hrilh bakah duhsakna a hlan. Malsawmthanga Keivom hian Manipur leh Mizoram inkalpawhna Tuivai luia Unity Bridge ṭha tak sorkarin a dawh kai avangin a lawmthu a sawi a ni.

Meth an man

Mizoram Police leh Assam Rifles ṭang dun chuan January 2, 2026 khan Keifangah methamphetamine kg. 11.062 an man a, cheng vbc 33.186 hûa chhût a ni. Methamphetamine neitua puh Hasan Ali, Badarpur district, Assam pawh an man a, Saitual Police Station-ah thubuai ziah luh a ni.

Thawhho zel remti

January 3, Zirtawpni tlai khan Aizawl East-II bialtu MLA B Lalchhanzova chuan a bial chhung Chhinga Veng Bethany area-a bawlhhlawh paih lirtheiin a thlen lohna hmuna bawlhhlawhte senghawi dan tur Bethany Area Caretaker Association nen an ruahman tawh an thlir let a, thawhho zel an remti. Kum 2025 chhung khan MLA hian bawlhlawh la khawmtute lawmman tur thla tin Rs 6,000 a tumsak a, December 2026 thleng thawhhona thuthlung an siam leh a ni.

Aizawl Temple-ah Larsap a inkhawm

Governor Gen. Dr Vijay Kumar Singh chu kum thar ni, January 1, 2026 chhun khan Salvation Army, Aizawl Temple Corps biak-inah a inkhawm a, kum thar chibai bûkna thu a sawi. Gen. VK Singh chuan, Mizo mipuite kum thar chibai bûkin, kum 2026 chuan beiseina, muanna, inunauna leh malsawmna a thlen a beisei thu a sawi a, "Kum thar lo inher chhuak hian calendar inthlak danglam satliah mai a entir lo a, hun kal tawhte thlir letna leh beiseina nena hma lam panna a entir a ni," a ti.