Inbumna leh sum inchhuhsak vanga man police-te bail-in an chhuak tawh

Kum 2025 tawp lam khan metham­phetamine lem leh gelatin detonator hmanga inbumna leh pawisa inchhuhsak luih vangin police-te'n police pali leh an thurualpui mi ṭhenkhat an man a; jail-ah dah luh ni mah se, bail-in an chhuak leh vek tawh.

Inbumna chungchang hi Aizawl SP Zosangliana chuan December 29, 2025 khan a pisaah press mite a hrilhfiah a; pawi khawihnaah police an lo tel ve chu pawi an tih thu leh zahthhlak an tih thu a sawi.

Aizawl SP chuan, meth leh detonator hmanga inbumna leh mi pawisa inchhuhsakna thubuaia police mi leh sa inhnamhnawihte chu police an nih avangin thup emaw, hum emaw, thubuai tihnêp emaw tumna a awm loh thu a sawi a, "Case-a inhnamhnawih police mi leh sate hi criminal case an awrh mai bakah, na taka hrem an nih theih nan Departmental Proceedings kalpuiin uluk taka chhui zui an ni a, suspend tawh an ni," a ti.

Heng thubuaia inhnamhnawihte hi thu zawhfiah a nih hnuah court thu angin jail-ah dah luh an ni a; mahse, court-in bail-in a chhuah tawh nia thu dawn a ni.

Meth lem hmanga inbumna:

November 16, 2025 tlai dar 5:45 khan Aizawl Police Station-in Special Narcotics PS aṭanga FIR an dawn angin thubuai an ziak lut a; an chhui zuina aṭangin police constable pali leh civil mi panga man zui an ni.

Police pali leh civil mi panga te chuan methamphetamine lei duh tur zawngin, a hun leh hmun turte an ruahman ṭhin a; meth lei tumtute'n an dàwr veleh police inhnamhnawihte chuan CID mi anga insawiin meth lei tumtute chu pawisa an chhuhsak ṭhin a ni. Hetianga sum chhuh lui hian ṭum ruk vel an lo hlawhtling tawh.

Detonator hmanga inbumna

Z Lalchhuansanga s/o Ngunawrha, Sangau, Lawngtlai district chuan December 19, 2025 khan Aizawl PS-ah FIR thehlut a, police-te'n BNS 61(2)/308(2)/319(2)/62/3(5) tlawhchhanin case no. 561/25 Dt. 19.12.2025 an ziak lut.

Aizawl PS-a police-te'n an chhui zui a, an chhuinaah meth lem hralh tum leh CID nia insawia mi bumtua puh police an lo man tawhte an inhnamhnawih tih an hmu chhuak a ni.

FIR-a a inziah dan chuan, Z Lalchhuan-sanga leh a ṭhiante pahnih - Romalsawma leh Vanhleia te chu November 17, 2025 zanah Sangau aṭangin HC Lalrinkimi, ITI Veng, Aizawl hnen aṭanga detonator lei turin Aizawlah an kal a, HC Lalrinkimi an thlen chilh.

November 18, 2025 zan tir lamah Z Lalchhuansanga leh a ṭhiante pahnih bakah, HC Lalrinkimi leh a ṭhiannu Lalngaihzuali te chu lirthei (Sumo)-in detonator lei turin inpekna tura an ruat Ramthar Veng mawnga Chite kaiah an kal a; detonator kawltu Lalrinchhani pawh taxi-in a thleng chawpchilh ve nghal. HC Lalrinkimi chuan detonator endik turin rucksack-a Rs 5,00,000 ak chungin taxi a pan a, Lalrinchhani chuan detonator sample a lo phawrh a, a bak chu báwmah awm thu a lo hrilh a ni.

Chutih lai tak chuan mipa pali hmai tuam, CID mi nia inchhálte an thleng a, taxi chu an hual nghal a, Rs 5,00,000 leh detonator-te chu an chhuhsak.

Thil thlen danah hian Z Lalchhuansanga chuan detonator neitu nia insawi Lalrinchhani leh CID nia insawite chuan an bum nia hriain, Police-ah complaint a thehlut ta a ni.