Mizorama oil depot din dan tur sawiho

December 29, 2025 tlai khan Food, Civil Supplies & Consumer Affairs (FCSCA) minister B Lalchhanzova hoin a pisaah Indian Oil Corporation Limited (IOC) hotute leh FCSCA official-te'n Mizorama oil depot siam dan tur an sawiho.

FCSCA Minister chuan, Lalduhoma kaihhruai sorkarin Mizorama oil depot bun chu Mizoram mamawh pawimawh tak a ni tih hriain, an sorkar tirh aṭangin theihtawp chhuaha hma an lak thu a sawi a, "Chief Minister-in DO letter hmangin a bawhzui reng bakah, Delhi lama hotute pawh a be pawp reng a ni," a ti.

B Lalchhanzova chuan Mizoram chu a awmna hmun a pawimawh avang te, ruahtui tlak tamna a nih avanga inkalpawhna a harsatna a awm ṭhin vang te, KMMTTP kal zelah te, South Asia politics boruak inlumlet avangte leh chhan dang dang vangtein energy security a neih a ṭul hle tih IOCL hotute a hrilh a, "Mizoram sorkar chuan a tih theih leh tih ve turte chu theihtawp chhuahin a unzui dawn," a ti.

Sorkar thuchhuah tarlan danin, B Lalchhanzova leh December, 2025-a Union Minister for Petroleum Hardeep Singh Puri nen inhmuh an tum chu Parliament thlasik ṭhutkhawm Ministry of Petroleum and Natural Gas (MoPNG) chuan Mizorama oil depot siam chungchang hi official level ah meeting an ko a ni. December 11, 2025 khan FCSCA secretary Teresi Vanlalhruaii chu meeting-ah hian a zuk tel.

Meeting-ah hian FCSCA Secretary hian Mizoramin oil depot a mamawh chhan hrang hrangte a zuk thlen. MoPNG-in Mizoram sorkar mamawhna leh ngennate chu zirhoa sawiho tur a tih angin chumi tih hlawhtlin dan tur kawng dap tura IOCL-te hriattir an nih angin FCSCA Minister ho hian meeting hi neih a ni.