Sorkar doctor zinga 347-in NPA an la; NPA la zingah private practice an awm lo

Mizoram sorkar Health & Family Welfare department-a thawk mek sorkar doctor 452 zingah Non Practising Allowance (NPA) la doctor 347 an awm a, NPA la zingah private clinic/hospital-a thawk an awm lo nia tarlan a ni.

Mizoram Resource Mobilisation Committee member-te chief minister Lalduhoma hoa December 29, 2025-a CMO Conference Hall-a an ṭhutkhawmah sorkar doctor-te dinhmun thlirho a ni a; HFW department-in report a thehluh danin, Mizoram sorkar doctor 452 an awm mek a, chu'ng zinga 347 chuan NPA an la a, doctor 105-in NPA an la lo. NPA la chunga private practice an awm lo a; Mizoram sorkar doctor zat 452 hi a ngheta thawkte an nia thu dawn a ni.

Mizoram Health Services Rules, 2009 behchhana Mizoram Gazette Notification February 18, 2010 leh December 18, 2024 Amendment chuan sorkar doctor (non-clinical) private practice-te chu NPA an lak a khap a, private practice turte pawhin phalna an lak a ngai. Meeting-ah hian NPA chungchang bawhzui zel dan tur duan a ni.

MEETING-A RÈL DANG

• Aizawla sumdawnna kalpuitu GST registration nei thei tura ngaih, registration la nei si lote zawn chhuah hna Aizawl City Local Council Association nena ṭang tlanga thawh an rel a; Taxation bawhzui turin an dah.

• Taxation official-te'n raid/verification an neih chânga invenna atana silai (arms) eng emaw kawl an dilna chu central sorkar leh state dangte tih dan angin, a ṭul hunah Home department nena thawh dun dan lo ngaihtuah ṭhin se, an ti.

• Importer & Exporter Licence holder-te'n KMMTTP kaltlanga bungraw che vela chhiah pek a nih leh nih loh endik hna thawh dan tur rawtna an thlen chu zir chian ni se.