Krismas pual thisen pekah unit 1,443 pe

Association for Voluntary Blood Donation (AVBD) leh Aizawla blood bank pathumte chuan December 2025 chhung khan Krismas puala thisen pek an kalpui leh a, thisen unit 1,443 pek a ni.

AVBD general secretary Lalrinkima tarlan danin, Krismas puala thisen pek hi Aizawla blood bank pathum - Civil Hospital Aizawl, Synod Hospital leh Zoram Medical College and Hospital-ahte kalpui a ni. Civil Hospital tan mi 837, ZMCH tan mi 323 leh Synod Hospital tan mi 283 ten thisen an pe a, a vaiin thisen unit 1,443 a tling.

AVBD hruaitute chuan, Krismas leh kum thar hunpui vuakvêt chu thisen pekah Mizoram dinhmun a hniam lai a ni ṭhin a, chuvang chuan kum 10 chuang kalta aṭangin Krismas puala thisen pek an buatsaih ṭhin thu an sawi.

January thla pawh thisen pek a tlakhniam hun lai a nih avangin thisen pe tura ngenna (flyer) an tihchhuah tawh thu AVBD hruaitute chuan an sawi a, "Thisen pe ṭhin pawl hrang hrangte hruaitu insiamrem hun lai a nih bakah, college leh zirna-in dangte chawlh lai a ni a, hengte avang hian January thlaah thisen pek a tlahniam ṭhin. Thisen mamawh an awm reng tho si avangin thisen pek nachang hre zel turin Mizoram mipui kan ngen a ni," an ti.