Sanghaah Mizoram hma lakpui turin Fisheries Minister-in Union Minister a ngen

Union Fisheries & Animal Husbandry minister Rajiv Ranjan Singh kaihhruaiin nimin khan Novotel Hotel, Hyderabad-ah National Fisheries Development Board (NFDB) Governing Body meeting vawi 12-na neih a ni a; Fisheries minister Lalthansanga pawh telin, sanghaah Mizoram a intodelh theih nan hma lakpui turin Union Minister a ngen.

Lalthansanga chuan, Mizoram chu sangha tharah a intodelh theih nan hma lakpui tura Union Minister ngenin, sorkar laipuia Integrated Aquapark Project thehluh tawhte chu a rang lama pawm turin a ngen a; Lengpuia Fisheries department rama training centre sak mek pawh ṭangkai zawka hman a nih theih nan NFDB leh ICAR-te thawhpui turin a sawm bawk.

Union minister Rajiv Ranjan Singh chuan, Mizoram harsatnate a hriatpui thu leh remchang hmasa berah harsatnate sutkian dan tur leh hmalak zel dan tur sawiho turin Aizawlah meeting neih a nih tur thu a sawi.

Minister Lalthansanga hi Fisheries secretary Lalrothanga leh depart-ment hotu dangte'n an ṭawiawm a ni.