Rinawm hi a pawimawh - CM

Chief minister Lalduhoma chuan nimin khan Chief Minister's Office-a thawkte chu CMO conference hall-ah thingpui a inpui a, rinawm a pawimawh thu sawiin, rinawm taka an hna thawk turin a chah.

CM Lalduhoma chuan, CMO-a thawkte chu kum thar chibai bûkin, an hna ṭheuh ṭha taka thawk chhunzawm turin duhsakna a hlan a, "CM mawhphurhna ka lak rualin thawhpui tur ṭha min pe turin Pathian hnenah ka dil a, nangni hi min pe a ni. In thawk rim tlang ṭhin tih ka hria a, ka lawm hle a ni," a ti.

Ram tan leh Pathian tan hna an thawk a ni tih hriaa taima taka thawk zel tura chahin Lalduhoma chuan, "Rinawm hi a pawimawh a, fel famkim kan awm loh avangin inngaihdam a ṭul hun a awm bawk ṭhin. Ngaihdam hi a ngaidamtu tan pawh damna a ni. Kan tlin tâwk lohnateah inngaidam tawn chungin lungrual takin kan thawk ṭhin dawn nia," tiin CMO-a thawkte a fuih.