Bawlhhlawh sâwngbàwlna kâng ṭhelh mit tawh

Aizawl khawpui bawlhhlawh paihna, Solid Waste Management Center (SWMC), Tuiriala bawlhhlawh chhûn khawm Kum 2025 tàwp lama kâng chu ṭhelh mih a ni tawh a; a chhung lamah mût a la awm avangin AMC thawktute'n ni tin bawlhhlawh an vil mek.

Vanglaini palai zawhna chhangin AMC hotute chuan, 2025 kum tawp lama SWMC-a bawlhhlawh chhûn khawm kâng chu Fire & Emergency Services nen ṭang dunin an ṭhelh mih tawh thu an sawi a, "Bawlhhlawh chhûn khawm chhungril lamah a mût a la awm a, ṭhál lai a nih avangin kângmei chhuak leh palh thei vengin tuiin kan phuh reng a, hunpui vuakvêtah pawh chawlh nei loin ni tin kan vil. FES lam pawhin a khât tawkin min puih reng," an ti.

SWMC-a bawlhhlawh kâng chu hâl a nih loh thu sawiin AMC hotute chuan, "Keini tluka a kan hlau an awm lo ang. A mût tihreh vat a ngai a, theihtawp chhuahin nilengin tuiin kan phuh a, tihreh vat kan tum," an ti a; bawlhhlawh paih a kaihlak phah loh thu leh a mût lohna laiah dah khawm zel a nih thu an sawi.

AMC tarlan danin, bawlhhlawh paihtu leh khawntute'n an thliar hran ṭhat tâwk loh vanga bawlhhlawh ṭawih thei lo (dry waste) zinga ṭawih thei (wet waste) inup lumin temperature sang tak a siam a, chu chuan gas kâng hma chi (methane gas) a siam a, chuvang chuan SWMC-ah harsatna a thleng fo tawh tih an tarlang.

AMC thuchhuah chuan, "Bawlhhlawh ṭawih thei lo zinga paih tel phal loh - battery, mobile phone, electronic item chi hrang hrang paih tel an awm avangin bawlhhlawh dah khawm zingah kângmei a lo chhuak tawh a, kângmei nasa a thlen hmain thawktute'n an ṭhelh mit leh thei hlauh a ni," an ti.

AMC chuan, SWMC-a kângmei chhuak chu an ngaihthah loh thu te, December 31, 2025 khan Municipal Commissioner hoin officer leh thawktute'n a hmunah an tlawh thute an tarlang bawk.