Lawngtlai district-a Myanmar ramri khâr January 11, 2026 aṭangin hawn beisei

Lawngtlai district bawrhsap Donny Lalruatsanga chuan nimin khan a pisaah Lawngtlaia thuthar thehdarhtute a kâwm a; kawng hrang hrangin Lawngtlai khawpui hmasawnna tur duan mek a nih thu leh, tuihri (cholera) nia hriat lêng vanga ramri khâr chu January 11, 2026 aṭangin hawn theih beisei a nih thu a sawi.

Donny Lalruatsanga chuan, Lawngtlai khawpui hmasawnna tur duan mek a nih thu sawiin, "A bik takin traffic chungchangah hmalakna lian tham tak neih tum a ni. Ram dang mi (foreigner) chungchangah inkhuahkhirhna felfai zawk siam a ni dawn a, state sorkarah thehluh a ni ang. Ramri khâr mek hi natna a darh lohna tur a ni a, inkaihhruiana felfai tak siamin January 11, 2026 aṭanga hawn theih beisei a ni," a ti.

Lawngtlai khawpui tana project lian zawk siama hmalakna turah - Cheural tlâng (Khaw za lang tlâng) Paithar tlâng, Diltlang hming put chhan dîl te hmachhawpah dah a nih thu Lawngtlai Bawrhsap chuan a sawi.

Bawrhsap chuan, Lawngtlai khawpui chhung veng hrang hrangte fainaa inelna 'Bawrhsap Award' chu kumin Republic Day-ah sem a nih tur thu a sawi a; hunpui laia buaina leh harsatna lian tham awm lo tura police, NGO, kohhran leh mipui thawhhonaah a lawm thu sawiin, kum tharah hmasawnna ṭha zawk nei turin duhsakna a hlan a ni.

Lawngtlai SP PC Lalchunglura tarlan danin, Lawngtlai district-ah hunpui lai khan dan leh thupek kenkawh kawngah harsatna lian a awm lo a, thubuai pali chiah ziah luh a ni. Kum 2025 chhung khan thubuai 65 ziah luh a ni a, kum 2024-a thubuai ziahluh aiin a tlem zawk.

PC Lalchunglura chuan, "Operation Jericho kalpui vang te, NGO leh MJA te nena thawhhona ṭha avangtein thubuai ziah luh ngai a tlem zel ka beisei," a ti.