Larsapin Viksit Bharat-a tel turte a kâwm

Governor Gen. Vijay Kumar Singh chuan nimin khan Lok Bhavan-ah Viksit Bharat Young Leaders Dialogue (VBYLD) 2026-a Mizoram aiawha tel tur ṭhalai 14 leh official-te a kâwm a, duhsakna a hlan.

Larsap chuan, Mizoramin hmasawn turin kawng hrang hrangah theihna nasa tak a neih thu a sawi a, "Viksit Bharat Young Leaders Dialogue, 2026-a Mizoram aiawh turte pawh heng zinga mi, an thiamna leh theihna aṭanga teha thlan chhuahte an ni," a ti.

Mizoram aiawha ram pum huap intihsiaknaa tel tur an nih avangin ṭha taka inpuahchah a, ṭha ber nih duhna rilru pu chunga inrintawkna nena intihsiakna hmachhawn turin Larsap chuan a fuih a; hnehna nen an lo kir theih nan duhsakna a hlan.

Viksit Bharat-a tel turte chuan, sorkarin hun remchang a siamsak avang leh Larsapin an puala inkawmhona a buatsaih avangin an lawm thu an sawi a; Mizoram tan theihtawp chhuah an tum thu Governor an hrilh.

Viksit Bharat Young Leaders Dialogue 2026 hi January 9-12, 2026 chhungin Bharat Mandapam, New Delhi-ah neih a ni ang.