KHAWTHLIR

Pisa kai ṭan

Mizoram sorkar hnathawkte chu kumin atan nimin khan pisa an kai ṭan a; restricted holiday (new year celebration) a nih avangin hna la zawm lo mi eng emaw zat an awm bawk. Nimin vêk khan sorkar hnathawk group B, C leh D bakah, pensioner-te December 2025 hlawh tur pek chhuah a ni.

Kawngpui chanve khâr ṭhin dawn

Traffic SP C Vanlalvena chuan hriattirna chhuahin, Salvation Army Aizawl Temple aṭanga Aizawl West College inkarah Ace Alliance-te'n tuichhe paihna pipe an phûm dawn avangin, zanin dar 9 aṭanga hna thawh zawh hma chu zan dar 9 leh zing dar 5 inkarah kawngpui chanve khâr a nih ṭhin dawn thu a tarlang.

Rakzu man

Lunglei Police-te chuan December 4, Pathianni chawhnu khan an thu dawn bawhzuiin K Lalhruaizela (24) s/o K Bawlkunga, Haulawng hnen aṭangin rakzu litre 370 an man a, cheng nuai 1.85 hûa chhût a ni. K Lalhruaizela hi Forest department quarters-a khawsa mek a ni.

MLA-in hlan

Siaha bialtu MLA Dr K Beichhua chuan nimin khan MLA fund aṭanga a lei super carry (mini truck) chu a bial chhung Meisavaih leh Meisatla-a kut hnathawk pawl pahnih - Meisavaih Liahry Association leh Meisatla Nûl Siam Association hnenah a hlan. Dr K Beichhua chuan, "Kan ramah hna thawk lo leh mahnia thawh chhuah tum lo kan tam lutuk hi kan buaina a ni," a ti a, 'Keima ei tur chu ka thawk chhuak tur a ni' tih ngaihdan nei tlat turin kut hnathawktute a chah.

Chetsualnaah thi

Joseph C Lalrinawma (22), Vairengte Bangla Veng chu lirtheia chetsualna avangin nimin chawhnu dar 1:08 khan a thi. Thu dawn danin, Joseph C Lalrinawma hian scooter-in a ṭhianpa a phur a, Vairengte khaw chhungah truck an tlân pelh dawn laiin an chesual a ni. Joseph-a hi Silchar panpui a ni a, Silchar damdawi-inah a hliam tuar loin a thi. Scooter-a a phurh erawh chuan hliam na lutuk a tuar lo thung.

SP-in lirthei tlân khap

Mamit SP Manny Bhushan Singh chuan thupek tichhuakin, Nidhi Creative Infrastructure-in Lengpui aṭanga Saiphal Bamboo Plantation link road (km 41) concrete pavement-a an siam mek chu ṭha leh tlo zawka siam a nih theih nan January 5 aṭanga February 4, 2026 thlengin Lengpui - Saiphal Bamboo Plantation link road (Lengpui Airport) aṭanga LBS Junction bul thleng lirthei tlan khap a nih thu a puang. Lirthei tê (light vehicle) tan tlan theih hun hawn a ni dawn thung.