LADC-a ZPM nena thawh dunna aṭangin MNF an inhnûkdâwk

MNF chu Lai Autonomous District Council (LADC)-ah sorkarna siam tura ZPM nen an thawh dunna, Lairam Legislature Party aṭangin nimin khan an inhnûkdâwk.

MNF general secretary R Rohmingliana, MLA chuan nimin khan Governor Gen. Vijay Kumar Singh hnenah lehkha a thawn a; LADC-a sorkarna siam tura ZPM nen an thawh dunna Lairam Legislature Party aṭangin political problem avangin an inhnuhdawh thu a hriattir a ni.

Tarlan tawh angin, LADC-ah sorkar siam dun turin ZPM Legislature Party leh MNF Legislature Party chuan December 15, 2025 khan thawhhona thuthlung an ziak a; leader (chief executive member) atan T Zakunga, ZPM MDC an thlang.

Thawhhona thuthlung ziah a nih dan chuan, ZPM-in CEM bakah executive member panga an chang dawn a; MNF-in deputy CEM bakah executive member pathum an chang ang. A bak zawng chu House Leader leh MNF Legislature Party inrâwnna anga hnawhkhah tur a ni.

LLP hian LADC-ah sorkar an siam theih thu December 15 tlai khan Governor hnenah an thlen nghal a; mahse, Governor hian sorkarna siam turin a la hriattir lo.

MDC 25 awmna LADC inthlan hnuhnung berah khan MNF-in MDC pariat, INC-in MDC pasarih, ZPM-in MDC paruk leh BJP-in MDC pahnih an la a; independent-in mi pahnih an tling bawk.