Phuaibuang Tlaizawng Paradise ṭan a ni

Tourism department bultumin nimin khan 'Phuaibuang Tlaizawng Paradise' ṭan a ni a, Assembly speaker Lalbiakzama'n Tuivai leiah a hawng a; vawiinah chhunzawma zawh a ni ang.

Phuaibuang Tlaizawng Paradise hawn a nih hnu hian nimin chhun khan hi Tuivai luiah nghakuai chiah rûnpui buatsaih zui a ni a, mi 600 velin nghakuai an chiah niin sorkar thuchhuah chuan a tarlang.

Tlaizawng Paradise chhung hian Phuaibuang khaw chhehvela pûk leh tlâng tlawh chhuahna hun (adventure tourism) buatsaih a nih dawn a; zan lamah Phuaibuang khelmualah khaw mipui kutchhuak thil chi hrang hrang pho chhuahna hun buatsaih a nih bakah, concert buatsaih a ni.

Assembly speaker Lalbiakzama chuan, leilung hausakna leh mawina hmanga zinmite hîp thei tura Phuaibuang khuaa 'Tlaizawng Paradise' buatsaih a ni chu ṭha a tih thu a sawi a, "Kan khaw mawina hluta rawn tlawhtu mikhualte lawm taka dawnsawn thiam a pawimawh," a ti a, khawtlang ṭanrual a pawimawh thu a sawi.

Tourism minister Lalnghinglova Hmar pawh thu sawiin, Tlaizawng Paradise chuan Phuaibuang leh a chhehvel khaw hrang hrang tan zinmite kaltlangin kawng eng emaw tala hlâwkna a thlen a beisei thu a sawi a, "Kan leilung hausakna humhalh chunga zinmite hîp thei tura kan ram mawinate hman thiam deuh deuh a pawimawh," a ti.

Tlaizawng Paradise chuan Mizoramin khualzin a hîpna kawngah hmasawnna a thlen a beisei thu sawiin Lalnghinglova Hmar chuan a sawi a; Tourism department ruahmanna tihlawhtling tura khawtlang hruaitute inpeknaah a lawm thu a sawi bawk.