Kawng chhia vanga harsatna a thlen tawh loh nan theihtawp chhuah turin chah

Nimin khan Kolasib DC conference hall-ah Kolasib district-a National Highway 306 & 06 siam mek chungchang sawiho a ni a; bialtu MLA Lalfamkima, Assembly deputy speaker chuan, nikum fûr laia kawng chhiat vanga mipuiin harsatna an tawh ang a thlen tawh loh nan theihtawp chhuah a ṭul thu a sawi.

Lalfamkima chuan, fûr ruahtui tlak hmain thla 4 vel hun ṭha a la awm tih sawiin, "Hemi chhung hian a chak thei ang ber leh ṭha taka hna thawh a ngai. Nikum fûr laia kawng chhiat vanga harsatna ang kha mipuite'n an tawh nawn tawh loh nan theihtawp chhuah a ṭul a, vantlang lirthei leh bungraw phur lirtheite harsatna tawk loa tluang taka an tlan theih nan kawngpui siam hi a hma zawng aia ngaih pawimawh zual a ngai," a ti a; ruahtui tlak hma ngeia peih turin NHDCIL leh contractor aiawhte a hriattir.

NHIDCL general manager BK Sivastav leh contractor te chuan an hnathawh tawh chin, hmachhawp leh an harsatnate an sawi a; kawng siamna atana bungraw mamawhte an lak khawm ṭhat thu leh a ṭul zual lai bikte chak taka thawh an tum thu an sawi.

Kolasib bawrhsap Robert C Lalhmangaiha chuan, mipui ni tin khawsakna nghawng a nih avangin NH chhe zual lai siamṭhat chu ngaih pawimawh a ṭul thu a sawi bawk.

Ṭhutkhawmah hian Kolasib SP Lalrinpuia Varte leh Additional SP, Kolasib SDO (Sadar), Kawnpui SDO (Civil), NHIDCL leh contractor hotu te, YMA Sub-Hqrs hruaitute, Kolasib Joint VC aiawh leh sorkar mi pawimawh dangte an tel a ni.