Mamit district-ah ruih theih thil kaihhnawih thubuai 323 ziak lut

Mamita Excise & Narcotics department chuan kum 2025 chhung khan ruihhlo leh zu khapna dan bawhchhiat kaihhnawihah mi 221 an man a, thubuai 323 an ziak lut.

Sorkar thuchhuah tarlan danin, Mamita END hian kum 2025 chhung khan NDPS Act, 1985 leh MLP Act, 2019 hnuaiah thubuai 323 ziak lutin, mi 221 an man a; ruihhlo - heroin gram 49.080, ganja gram 3,024, khuh damdawi (codeine based cough syrup) phial 50 leh alprazolam gram 255.420 an man.

Zu chi hrang hrang - rakzu litre 2,048.375, zu bilhlai ṭin 4,927, sapzu litre 103.500, beer bûr 129, grape wine/juice ûm 36, zu thlawrna bêl 103 leh lirthei pasarih an man bawk.

END chuan Mamit district-a khaw hrang hrangah ruihhlo ṭhat lohzia leh tih pawizia inzirtirna an buatsaih ṭhin a, Tripura state chhunga Zampui tlangdungah pawh an buatsaih ṭhin. Awareness campaign kaltlang hian ruihhlo la ti lo ṭhalai/tleirawl mi 416 chu ruihhlo ti lo turin an intiam a, chung mite hnenah chuan certificate an pe ṭhin a ni.