KHAWTHLIR

AMC election RO

State Election Commission chuan Aizawl Municipal Corporation (AMC) General Election 2026-ward no. I-V returning officer atan Victor Lalawmpuia, FCSCA department joint director a ruat. Victor Lalawmpuia hma hian RO atan Lalhmansanga ruat a ni a, ani hi Lunglei Municipal Council chief executive officer ni turin sawn a ni.

Minister leh officer

Minister Dr Vanlalthlana chuan nimin khan a department enkawl pathum - School Education, Higher & Technical Education leh Information & Communication Technology department hotute a pisaah kum thar inhlanna hun a hmanpui. Dr Vanlalthlana chuan, "Keini lo chu Pathianin Mizoram siamṭha turin kut dang a nei lo a, kan hna hi Pathian rawngbawlna a ni tih hre rengin theihtawp chhuah chhunzawm zel ang u," tiin a sáwm.

Chawimawina hlan

South Tuipui bialtu MLA Jeje Lalpekhlua chuan January 5, Thawhṭanni khan Hnahthiala Horeb conference hall-ah Aizawl Hnahthial Students' Union (AHSU)-in graduate chin chung lam zirlai ti ṭha lawmpuina an buatsaih a hmanpui a, zirlai 23 hnenah chawimawina a hlan. Jeje Lalpekhlua chuan, harsatna vanga zirna chhunzawm thei lo, lehkhathiam thei si an awm chuan a hnena thlen ṭhin turin kal khawmte a chah a, ṭanpui dan tur kawng a zawnpui tur thu a sawi.

Zu leh beer an man

Bairabi-a police-te chuan January 5, Thawhṭanni zing khan Bolero pick-up TR-02 L-1745 aṭangin sapzu eng emaw zat an man a; zu neitua puh Hassan Ahmed (26), Patharkandi, Assam pawh an man nghal.Bairabi police-in zu an mante chu KD Whisky ûm 1,200, Tuborg beer bûr 288, Kingfisher beer bûr 240, leh Kingfisher beer ûm 60 a ni a; a vaiin Rs 2,32,560 hûa chhût a ni.