Lok Sabha-ah CAB put luh a ni CAB-in Mizoram a huam lo - Chief Minister
Parliament session neih mekah nimin khan Lok Sabha-ah Citizenship Amendment Bill (CAB) put luh a ni. Chief minister Zoramthanga chuan, CAB-in Mizoram a huam lo niin a sawi.
Union Home minister Amit Shah chuan nimin khan Lok Sabha-ah CAB a pu lut a, Speaker-in bill introduce duh leh duh loah vote a la a, duh an tam zawk. He thu ziah lai thleng hian CAB chungchang hi sawiho a la ni a, pass a nih leh nih loh hriat hman a ni lo.
Hetih lai hian, nimina Mizo Hnam Runa inkhawmah CM Zoramthanga chuan thu sawiin, CAB chu sakhuana vanga intihduhdahna tâwk Pakistan, Afghanistan leh Bangladesh aṭanga India rama rawn lutte khua leh tui nihna pek theihna tur kum tihtlemna a nih thu a sawi a, "Mosolman-te erawh a huam lo. Mosolman rama sakhuana vanga tihduhdahte tana tih a nih avangin an lo kal ve lo ang tiin an telh lo a ni ang," a ti.
Chief Minister chuan, CAB chu Mizoramah pawh nasa taka dodal a nih thu sawiin, "Home minister Amit Shah a lo kalin political party leh NGO aiawhte'n an hmu a, CAB an duh lohna an thlen a ni," a ti a; Parliament-a CAB an put luhah Mizoram an huamtir lo nia sawiin, lawmawm an tih thu a sawi.
A tirah chuan mipui thlan tlin MLA-te'n an pawm loh chuan CAB chu Mizoramah chuan telh lo tura an thlen thu sawiin Zoramthanga chuan, "Chutiang ngai lo tur chuan Mizoram chu an telh lo law law a ni. Clause 111 (2)-ah chuan, India danpuia 6th Schedule-a awmte leh Bengal Eastern Frontier Regulation, 1873-in inner line a tih chhunga awmte a huam lo vek tih tarlan a ni. Mizoram kan tel ta lo hrim hrim," a ti.
Chief Minister chuan, CAB hmanga an target ber nia lang chu West Bengal lama Muslim lutte dan an duh vang a nih thu a sawi a; CAB chuan Assam-a hmun eng emaw zat pawh a huam lo a, huam loh dang pawh a nei nual niin a sawi a ni.
CM Zoramthanga chuan, CAB-in Mizoram huam lo mah se, MZP-te'n total bandh an buatsaih tur chu àwm an tihpui thu a sawi a, "Keini zawng kan tel ve lo nã a, lo leh àwl ringawt chu kan ṭhian a huamte rilru natna lantirpuina atan. Thil kan nawr chuan tih tlàn dial dial ṭhin kha tiin bandh an buatsaih dawn a, kan hriatthiampui khawp mai," a ti.