Lungleiah ZPM pisa hawn a ni

Zoram Peoples' Move-ment (ZPM) Southern Hqrs. pisa thar, Lunglei Chanmari Veng a mi chu nimin khan ZPM secretary general K Sapdanga'n a hawng.

Pisa inkhawm hi ZPM Southern Hqrs. vice president V Kap-chungnunga'n kaihruaiin, ZPM Secretary General chuan pawl parukte ZPM-ah an thawhho aṭanga thla 15 naah inthlan an hmachhawn thu sawiin, "Organisation set up la fel lo te, thawktu indaih lo te, inbuatsaihna hun tawi lutukte avangin, ZPM leh a kalphung thar kha Mizoram mipuiin an hre kim hman lo," a ti.

K Sapdanga chuan MLA inthlanah pawisa an harsat thu sawiin, "Political party dangten an lo chin ṭhin tute emaw (hnam dang etc.) hnena tukluih donation khawn ṭhin hi ṭha kan ti ve lo. Keimahni chhunga a thei theiin an thawhkhawm chawp leh, anmahni kan hriat lohten Mipui Buhzem account-a an rawn thawhkhawm awmchhunte kha insemin inthlan kan hmachhawn a ni," a ti a, inthlan hmachhawn a harsat thu a sawi.

Assembly House-ah member 7 neiin, eptu pawl lian ber ni mah se, ZPM chu body-te reuh te, member tlemte nei an nih thu sawiin K Sapdanga chuan, "September thla thar aṭangin registration neiin, party kan ni thar ve a, tun thla thum chhung hian block 8 leh unit 180 vel chauh ziahluh thar an awm. MLA inthlana ZPM vote-tu tam berte kha ZPM mi chauh an ni lo, neutral te, party danga awm mekte pawh an ni tih a chianna chu veng mal, vote tla aṭanga 82% kan channaah pawh unit ding turin kan inko khawm hlawhchham tho," a ti.

K Sapdanga chuan CAB chungchang sawiin, "October 25-a Union Home minister Amit Shah Aizawla a lo kal khan, CAB tharthawh tumna kan dodal thu ZPM hmingin memorandum kan lo pe a ni. Home Minister office-ah November 29, 2019 chhun dar 12-a sawiho turin, November 28 zing­ah kohna kan dawng. Hminghmerha kohna a nih vang­in, kan president leh kan legislature group leader ka rawn a, an thurawn angin ka liam thla nghal," a ti a, MNF leh Congress-ah chuan hming hmerha an kohte an tel ve loh thu a sawi.

Inkhawmah hian MLA Lalduhoma chuan ZPM zawm tharte a lawmlut a, tun hnaiah MNF chhungkaw boruak a chiri hle nia sawiin, "Hei hi a chhan chu an president hian inrin tawkna a neih loh vang a ni a, a OB puite leh a executive-te a rin zawh loh vang a ni. MNF party mipuite hian an mahni kutthlakna ngei hruaitu neih hi an duh leh chak ber a nih laiin Pu Rama tlak hlau hian official candidate zawng hlirin party inthlan hi a kalpui char char a, rulling party-ah hian chhimlam mipuiten aiawh in nei ta lo," a ti. 

Lalduhoma chuan Congress party chuan India rampumah tlakchhiat lam an pan zel nia sawiin, "Mizoram Congress party phei hi chu tho chhuak leh turin Pathianin a ruat tawh lo niin a hriat. Chuvangin Congress party mipuite chu ZPM party zawm zel turin kan sawm che u a ni. CAB chungchang ah hi chuan Congress leh MNF party te hian sawi tur an nei loa, Congress pawh hian an sorkar lai khan an do ngam lo a, MNF pawh hian an do ngam leh chuang lo," a ti a, MNF leh Congress chu kan hnam himna ngai pawimawh loah a puh. ZPM thuchhuah tarlan danin, inkhawmah hian Lunglei South bial aṭangin mi 154 lawm luh an ni a, an zingah hian VC member pahnih leh Congress hruaitu eng-emawzat an tel a ni.