Kohhran ṭhalai hruaitute HIV/AIDS sawipui

Health & Family Welfare minister Dr R Lalthangliana kaihhruaiin nimin khan Assembly Annexe conference hall-ah kohhran ṭhalai pawl hruaitute HIV/AIDS leh a dona chungchang sawipui an ni.

Dr R Lalthangliana chuan, kohhran hrang hranga mite chu anmahni zâwn ṭeuha HIV/AIDS dona kawnga ṭan la thar tura sáwmin, chhungkaw tinte pawh ṭawngṭainaa hlân turin a ngen a, "Ngawi renga nunna latu hi tun aṭanga do a nih loh chuan hnamin a la tuar ang," a ti.

Mizoram State AIDS Control Society (MSACS) project director Dr Lalthlengliani'n 'HIV/AIDS and Christian Youths' tih thupuia a sawi a, "HIV/AIDS chungchangah India ram pum a hniam zawnga a kal laiin, Mizoram a sang zawnga a kal hi chona nasa tak a ni," a ti a; sorkar, mipui, kohhran leh pawl hrang hrangte thawhpuiah a sáwm.

Dr Lalthlengliani chuan, sorkar kum 2019-20 bikah September 2019 thlengin nu naupai zingah HIV hrik pai district hrang hrangah hmuh chhuah zel a nih thu leh Aizawl district-ah a tam zual thu a sawi a; kohhran ṭhalaite'n tih theih hrang hrang an nei tih sawiin, HIV hrik paite hmusit lo turin a chah. HIV/AIDS dona chungchang sawihonaah hian kohhran hrang pakua aṭangin an hruaitu mi 50 vel an tel a ni.