National Voters' Day hman a ni

January 25, Inrinni khan India ram hmun dang rualin Mizoram hmun hrang hrangah pawh National Voters' Day hman a ni a, Aizawlah chuan Synod conference centre-ah governor PS Sree­dharan Pillai hoa hun hman a ni.

Governor chuan inthlang ram kan nihna vawngnungtu leh vawnghimtu Election Commission of India (ECI) din champha-ah Voters' Day chu kum 2011 aṭang khan la hman chhunzawm zel a nih thu sawiin, "Ram zalena cheng leh mipui aiawh thlangtute kan nih angin khua leh tuite tan he ni pawimawh tak hi a hlu hle a ni. Voters' Day-in a tum ber chu vote nei thei chin, kum tling tawh apiang te vote neih tir a ni. Vote neih hi khua leh tuite chanvo leh dikna a nih mai bakah mawhphurna hlenna a ni," a ti.

Khawvel hmudang ang bawkin Mizoram hmalam hun chu tuna ṭhalaite kutah a in­nghat tih sawiin Larsap chuan, "Ṭhalaiten phone an hmang nasa a; hei vang hian vote nei tura inziah luh pawh a awlsam phah. Chuvangin ṭhalai themthiam leh tunlai thiamna hmang ṭangkai thei apiangte an mobile kaltlangin ECI buatsaih, voter helpline app-ah luta vote nei tura inziak lut vek turin ka sawm a ni", a ti a, mipui thu­neihna ram anih anga India dinhmun sawh nghet tura inthlan­ dan kalphung hriatchian leh inthlan huna phur taka tel ve zel chu ECI duhdan a nih thu a sawi

Governor chuan tun hnaiah Mizoram Legislative Assembly Election, 2018 hlawhtling takin neih a nih thu sawiin, "Hei hi State Election Official-te inpekna rah a ni. ECI pawh khawvel thiamna ṭhang mek zelah a inbuatsaih thar zel a; mipui rintlak ni turin inthlan dan kalphung a siam thar thei zel a ni. Inthlan niah pawh hmun ralmuang lo laia polling area-te chu video hmangin vil a ni tawh a. ECI buatsaih Communication for Election Tracking  hmangin polling booth zawng zawng englai pawhin vote thlak ni chuan vil reng a ni tawh," a ti.

Inkhawmah hian Chief Election Commission thuchah chu video hmanga ngaihthlak a ni a, chumi hnuah day pual thutiam Govt. Synod HSS-a class XII zirlai Josephine Lalramchangi kaihhruaiin chhamrual a ni. Larsap chuan Lok Sabha MP inthlan neih zawh taka hnathawkṭhate hnenah CEO Special Award a hlan nghal. Kumin National Vo­ters' Day thupui chu 'Demo-

cracy tihchakna tura inthlan kalphung hriatchian' tih a ni.