Vawiinah total bandh huaihawt a ni dawn

Citizenship Amendment Bill (CAB) dodal nan Mizo Zirlai Pawl (MZP) chuan vawiin hian Mizoram district khawpui hrang hrangah total bandh an huaihawt dawn a; bandh chu ṭha taka thláwp turin mipui an ngen.

Vawiina total bandh huaihawt tur hi North East Students' Organisation (NESO) bultuma tih a ni a, MZP pawh NESO member an nih angin, Mizoramah an huaihawt ve dawn a; hmarchhak state dang zawngah pawh kalpui a ni ang.

Total bandh hi Aizawl leh khaw hrang hrangah huaihawt a ni dawn a, zing dar 6 aṭanga tlai dar 4 thleng awh tura ngaih a ni. CAB (draft) hâl an tum bawk.

MZP chuan total bandh vanga harsatna tâwk an awm a nih chuan hriatthiamna an dil tih sawiin, "Bandh hian ni tin khawsak a nghawng a nih pawhin, kan ram leh hnam himna tura beihna a nih avangin, kan zavaia tan a ni tih hriaa thláwp turin mi tin kan ngen a ni," an ti.

India sorkarin hmarchhaka Inner Line Permit (ILP) hmanna state pathumte leh Sixth Schedule hmanga inrêlbawlna hmunte CAB huamtir loh a tum chu a la tâwk lo tih sawiin, "Kan ram, kan hnam leh sakhaw tana a ṭha ber beiseia theihtawp chhuah zel a ṭul," an ti a; Mizoram mai ni lo, hmarchhak bial mipuite an ṭan rual a ngaih thu an tarlang.

MZP chuan, CAB-in Mizoram huam lo mah se, ṭhenawm state-te a huam si chuan Mizoram tan a him chuang lo ang tih an hlauhthawn thu sawiin, "Tun hnaiah Assam-in foreigner-te laka inven nana NRC an buatsaih pawhin chawp leh chilha a nghawng nghal chu Mizoram a ni," an ti a; CAB chu do zel turin Mizo mipui an sáwm a ni.

MZP thuchhuah chuan, CAB a hlawhtlin loh nan kohhranhote an ṭawngṭai te, Synod Inkhawmpuiin CAB duh loh thu an rél leh Aizawl kawtthlerah CAB dona thuziak an tárte chu lawmawm an ti a, thlamuanthlak an tih thu a tarlang a, "Heng hian rah ṭha a chhuah ang tih kan beisei tlat a ni," a ti.