Chief Minister-in Mizoram State Games a hawng

Mizoram State Games, 2019 chu nimin khan Rajiv Gandhi Stadium-ah chief minister Zoramthanga'n a hawng. State Games-ah hian Assembly constituency 40 aṭangin infiammi 6,672 an tel a ni.

Hawnna inkhawmah Chief Minister chuan, hun rei tak hnuah Mizoram State Games neih a ni leh thei chu lawmawm a tih thu a sawi a, "State Games-ah hian mi dangte hnualsuatna emaw, deuna emaw nei loin unau angin kan inen tur a ni. Mizoram hi India ramah kawng hrang hranga hmahruaitu a ni a, Kristian sakhua thehdarhnaahte hma kan hruai a, hmasawnna kawngah pawh hmahruaitu nih kan tum," a ti.

Thusawitu dang, Sports minister Robert Romawia Royte chuan State Games chu Mizoramin sports discipline hrang hranga hma a sawn belh theihna tur nia a beisei thu sawiin, infiammite chu theihtawp chhuah turin a chah.

Games hawnnaah Mizoram NCC Air Squadron ten airshow an entir a, infiammite chuan games neih chhung hian infiammi dik tak rilru pu a, dan leh kaihhruaina te zawm a, infiamna ṭha tak nei turin an intiam.

Mizoram State Games hi Assembly constituency-te inelna a ni dawn a, constituency 40 aṭanga tel infiammi 6,672-te chu discipline 32 (event 221)-ah an intihsiak dawn a ni. Infiammi tel tamna ber constituency Aizawl East-I aṭangin mi 315 an tel a, tel tlemna ber Tuichawng bial aṭangin mi 48 an tel a ni.