KHAWTHLIR

Police Training School (PTS), Thenzawla thawkte chuan nimin khan PTS conference hall-ah intuaitharna leh sum enkawl dan zirna an buatsaih. Inkhawm hi sub-inspector H Lalsangzuala'n kaihruaiin, PTS assistant principal Saidingliana Sailo-in refresher training leh financial management awareness buatsaih chhante a sawi. Thenzawl MRB manager Thelma M Zokimi chuan sum hman dan, bank dawr dan tur leh sum leh pai chungchanga hriat tur pawimawh hrang hrangte a sawifiah.

Baptist Higher Secondary School NSS unit chuan nimin khan Serkawna Tucker Hall-ah Christian Hospital tan thisen unit 116 an pe a, a petute hmeichhia 62 leh mipa 54 an ni. Mamit College pawhin Krismas lo thleng tur pualin nimin khan Mamit District Hospital tan thisen unit 20 an pe a, petute hmeichhia 13 leh mipa pasarih an ni.

Serchhip District Advisory Committee on School Safety chuan nimin khan Serchhip DC conference hall-ah sikul himna chungchang zirhona, 'Training of teachers on school safety' an buatsaih a, district bawrhsap Sangchhin Chinzah-in a hawng. Training-ah hian Serchhipa sikul hrang hrang zirtirtute an tel a; 'Concept of school safety and school disaster management plan' leh kângmei chhuak thei chungchanga chet dan turte an inzirtir a ni.

Lai Autonomous District Council (LADC) budget chu hun rei tak pass theih a nih loh hnuin nimin khan pass a ni a, kum 2019-2010 LADC budget chu cheng vbc. 192.53 a ni. LADC session hi chairman V Zirsanga'n kaihruaiin, CEM T Zakunga chuan budget hi pass pui turin member-te a sawm a ni.July, 2019-a LADC Budget Session neihah sorkar rintawk lohna motion House-ah putluh a nih vangin budget pass theih a ni lo a, thla li chhung budget nei loa LADC a kal hnuah budget pass a ni ta a ni.

Lawngtlai District Disaster Management Authority (DDMA) chu nimin khan an chairman Shashanka Ala, Lawng­tlai DC hoin DC confe­rence hall-ah an ṭhu khawm. Shashanka Ala chuan an district chu khuarel chhiatna thleng hlauhthawnawmna hmuna awm a nih avangin chhiatna thleng mai thei lo hriat lawk a, fimkhur taka a hma­chhawn dan lo zir chu a pawimawh thu a sawi. Meeting-ah hian khuarel chhiatna laka invèn dan tur leh hmalak dan turte sawiho a ni.

Nimin, December 16-a Vanglainia Mizoram UPC General Assembly-in budget atan cheng vbc. 12.69 an pass tih chu, cheng vbc. 22.69 tih zawk tur a ni.

Mizoram Board of School Education (MBSE) chuan, NESO huaihawta Citizenship Amendment Bill duh loh lantirin vawiinah total bandh huaihawt a nih dawn avangin, DIET 1st semester 'Cognition, Learning and the Socio­logy Cultural Context' paper vawiina exam tur chu December 13, 2019-ah sawn a nih thu a tarlang.