CAB vanga total bandh neih tur Pawl hrang hrangin an thláwp

Mizorama political pary hrang hrangte chuan Citizenship Amendment Bill (CAB) duh loh lantirna atana vawiina MZP-in total bandh an huaihawt tur chu an thlàwp thu an tarlang.

ZPM party office bearer-te nimina ṭhukhawm chuan, CAB chu an duh lo a, Parliament-ah pawh pass ni lo se an duh thu an tarlang a, "NE mipui duh dan kalhin Parliament hian CAB a pass lui tur a ni lo tih hi ZPM chuan India ram mipuite hriat­ah a puang a, chuvangin, Dt. 10.12.2019-a NESO huaihawt NE Shutdown hi full support kan pe a ni," an ti. 

ZPM chuan, "Indopui pa­hnihna lai khan mainland India-ah silai puak loin kha indopui rapthlak takah khan North East India hian indona rapthlak tak tuara Japan lo hmachhawnin, India lo humtu kan ni tih India sorkar hian hria se," an ti a; Indopui Pahnihnaah hmarchhak India mipuite vangin India a him a ni tih India sorkarin hria se an duh thu an tarlang.

MPC party chuan, CAB dodalna total bandh an thlàwp thu an puan bakah, MZP hmalakna chu theihtawp chhuaha ṭawiawm turin an party mite an chah a; "BJP kaihhruai sorkar laipui hian CAB hmanga Mizoram Kristiante min chîmral hi an tum lian tak a ni. Hnam dangte ngaihngam taka Mizorama an khawsak theihna tura thiam taka an hmalakna hmanrua CAB hi a tàwp thlengin kan dodal zel dawn a ni," an ti.

Congress party ṭhalaite chuan, NESO-in hmarchhak pumah leh MZP-in Mizoramah total bandh an huaihawt tur chu ṭha an ti a, an thlàwp thu an tarlang a, "Hmarchhak mipuite duh lo chung chunga CAB pass tum lui tlattu BJP sorkar hi Mizo mipui duh ang ngeia hnualsuat a, an hnuaia pawl NEDA aṭanga inhnûkdâwk ngam turin MNF-te hi kan phût a, CAB dodalnaa rálbáng loa Mizo mipui thlamuanpui thama thâwm nei turin kan phût bawk," an ti a; Mizoram Lok Sabha MP pawh Parliament-ah huaisen taka ṭang ngam tur leh CAB duh leh duh lo vote thlak hunah a vote-na tur puangzar turin an phût tih an sawi bawk. 

CAB dodalna total bandh hi an thlàwp thu zirlai pawl dang pahnih - Mizo Students' Union (MSU) leh National Students' Union of India, Mizoram pawhin an puang. MSU chuan, Mizorama total bandh huaihawtah MZP-te a ṭul anga puia che chhuak turin an member-te an chah. Mizoram Merchant Association (MIMA) pawhin thu­chhuah siamin, total bandh chu an thlàwp thu an tarlang a, an member-te leh sumdawng zawng zawngte chu dàwr hawng lo turin an ngen a ni.