CAB chungchanga ngawiah CM puh

BJP Mizoram Pradesh president Prof. JV Hluna chuan nimin khan an party pisaa inkhawmah thu sawiin, Citizenship Amendment Bill (CAB) chungchangah chief minister Zoramthanga chu a ngawi tlat niin a sawi.

Prof. JV Hluna chuan, Union Home minister Amit Shah-a'n CAB chungchangah Mizoram a ngai pawimawh a, Mizoram a tlawh ṭuma a thusawi angin, CAB tihpuitlin a nih hmain Mizorama NGO leh political party hrang hrangte sawihona a siamsak tih a sawi a, "Mizorama kan hotupa ber CM Pu Zoramthanga'n mipuite tan CAB chungchanga ngaihdan sawina hun ṭha berah a kal ngam lo hi a pawi hle a ni," a ti.

Mizorama NGO leh political party hruaitute leh Amit Shah inkawmnaah tel lo mahse Zoram­thanga chuan a hnu lawkah Amit Shah chu hmuin, CAB chungchang a sawipui nia sawi chungchangah JV Hluna chuah, "CAB chung­chang a sawipui rêng em tih pawh kan la hre lo," a ti a; Mizo zinga CAB chungchangte thlamuanna thu pawh a la chhâk chhuak lo nia sawiin, Mizo mipui zah lohnaah a ngaih thu a sawi.

Prof. JV Hluna chuan, MNF chu Mizoramah BJP thawhpui anga lang ngam si lo, sorkar laipui lama BJP thawhpui leh em em si an nih thu sawiin, "Mize nghet lo tak, Mizote'n kan huat em em, lehlama awr duma lehlama awr sen ang maia awm hruaitu kan nei hi a vanduaithlak tak zet a ni," an ti.

Mizoram BJP President chuan, CAB-in Mizoram a huam loh tur thu Union Home Minister-in a sawi tawh tih sawiin, "A thlamuanthlak hle. He Bill hi lo páwng hlauh nghal ringawt kan ni erawh hi a zia lo viauin ka hria," a ti a; Mizote chu hlauh ngah em em hnam an nih thu a sawi bawk.