Buhfai thûr sem enfiah phût

ZPM ṭhalai chuan thu­chhuah siamin, tun hnaia North Vanlaiphai kudam aṭanga lak chhuah buhfai thûr khaw hrang hrangah sem a ni chu pawi an tih thu an tarlang a, enfiah vat turin Mizoram sorkar an phût.

ZPM ṭhalaite chuan, MNF-in an sorkarah Mizo buh hlîr sem an tiam laia buhfai thûr sem a ni leh ṭhin chu mipui hmuhsitnaa an ngaih thu sawiin, "Ration buhfai semah sorkarin quality control a hlam­chhiah hi a pawi a, tun hnuah buhfai thûr sem a nih tawh loh nan chak taka hma la tur te, tun hnaia buhfai thûr sem pawh a tithûrtu hi eng nge, ei atan a him em, tih enfiaha laboratory test nei ngei tur leh, ei atan a him leh him loh mipui hnena puangzar tur­in sorkar kan phût a ni," an ti.