Vaṭhuampuiah Naumariamlak Kût hmang; Mizoramin kawng dik a zawh mek - CM

Páng Zirlai Pawl (PZP) chuan nimin khan Vaṭhuampui khelmualah 'Naumariamlak Kût' (Nau Lawm Kût) an hmang a, chief minister Lalduhoma'n a hmanpui. CM chuan, ZPM kaihhruai sorkarah Mizoramin kawng dik a zawh mek thu a sawi.

Chief Minister chua, ZPM sorkar kum hnih chhungin hmasawnna tam tak a awm thu a sawi a, "Sum leh pai enkawl thuah te, mipui vantlang hriselna leh healthcare lamah te, thlai thar hralhna kawngah te, inkalpawhna kawngah te, power sector-ah te, zirna sang zawk lamah te, khuarei daih hmasawnna (sustainable development) lamahte nasa takin hma kan sawn a, kan ram hian kawng dik a zawh mek a ni," a ti.

Kaladan Multi Modal Transit Transport Project (KMMTTP) chungchang sawiin Lalduhoma chuan, Mizote leh ṭhenawm state-te'n an nghakhleh thu a sawi a, "Hman ni lawk khan Myanmar ram chhunga KMMTTP kawngpui sialtu company hotute nen kan inkâwm a, kum 2027-ah an hna hi thawh zawh theih an inbeisei," a ti a; KMMTTP a taka chhawr hun tur a hlat tawh loh thu leh a ṭangkaipui bertu tur chu Lawngtlai district mite an nih thu a sawi.

Lalduhoma chuan, Zo hnahthlak pêng hrang hrangte'n zia leh tih dan hrang an neih thu sawiin, "Kan hnam pêng ziate hi kan theihnghilha a rirâl a hlauhawm. Ṭhangtharte'n kan hnam ze ṭha tak tak te, kan ṭawng te, kan thu leh hlate a boral loh nan ṭha taka kan humhalh thiam a ngai," a ti.

Sorkarin Mizo hnam ṭobul chhui chiang turin hma a lak mek thu sawiin CM chuan, "Mipui náwlpui pawm tlàn theih history rintlak kan chhuina kawngah pawh Páng history hian dinhmun pawimawh tak a luah dawn," a ti a; Aizawla Ainawn Vengah Páng Hostel sak tum a nih thu a sawi.

Chief Minister chuan, zirna ngaihlu hnam apiang an dingchang zel tih sawiin, zirna ngai pawimawh turin Páng zirlaite a chah a; khawtlang nun ralmuang leh hmasawn a awm theih nan ruihhlo leh sualna dang lakah fihlim turin a fuih bawk.