KHAWTHLIR

Khua la vawt dawn

Disaster Management & Rehabilitation department chuan thuchhuah siamin, Indian Meteorological Department aṭanga thu an dawn danin, Mizoramah ni eng emaw zat chu khua a la vawh zual dawn thu an tarlang. DMR hian January 4, 2026 aṭangin Mizoram district tinah temperature a tlakhniam avangin khua a vawt zual tih an tarlang a; khaw vâwt vanga taksaa nawm lohna neite chu damdawi-in pan vat turin an chah a ni.

Awareness campaign

Saitual DC Dr Lalngura Tlau chuan nimin khan Saitual Chawnpui hall-ah District Hub for Empowerment of Women & Women and Child Develpoment hmalaknain ni 100 chhung awh tur 'Child Marriage Free Bharat Awareness Campaign' a hawng. DC chuan, kum tling loa inneite bakah, a buaipuitute leh hriatpuitute chu dan hnuaiah hrem theih an nih thu a sawi a, "Kum tling loa inneih leh nau pai hian taksa leh rilru lamah nghawng ṭha lo tak a nei thei a, an fateah piansualna hial a thlen theih bakah rilru lam thlengin a nghawng thei," a ti.

Larsap-in lawmpui

Governor Gen. Dr Vijay Kumar Singh chuan nimin khan India rama naupang chawimawina sang ber Pradhan Mantri Rastriya Bal Puraskar 2025 dawngtu Esther Lalduhawmi Hnamte hnenah lawmpuina a hlan. Larsap chuan, Esther Hnamte chu thinlung taka a lawmpui thu leh a hlawhtlinna hi Mizoram mai bakah, India ram pum tana chhuanawm a nih thu a sawi a; hmasawn zel tuma training tur leh ṭhalaite tana entawn tlak ni zel tura chahin, a kal zelna turah duhsakna a hlan a ni.

Saza kâptu man

Aizawl Forest Division hnuaia Seling leh Saitual range-a thawkte chuan January 7, Nilaini khan an thu dawn bawhzuiin, Sesawngah in an dap a, saza sa manin, saza kaptua puhte an man nghal. Saza kaptua puhte hi nimin khan Central Jail-ah dah luh an ni.