Dec 2026-ah Tlaizawng Paradise ti leh dawn

Tourism department buatsaih Phuaibuang Tlaizawng Paradise chu January 7, Nilaini zan khan khâr a ni a; Tourism minister Lalnghinglova Hmar-in hmanpuiin, Tlaizawng Paradise chu kumin December thlaah buatsaih leh tum a nih thu a sawi.

Lalnghinglova Hmar chuan, Mizorama khaw hrang hrangin leilung mawina leh hausakna danglam bik an neih thu a sawi a, "Phuaibuang khua hi pangpar mawi tak, tlaizawng parna hmunpui a ni a, zinmite hîp nan heng hausaknate hi hman ṭangkai a pawimawh. Tlaizawng Paradise hi tlaizawng vul nasat hun lai berah buatsaih a nih theih nan ruahmanna siam a ni a, kumin December thlaah buatsaih leh tum a ni," a ti.

Ram leilung hausakna a hlut lehzual nan a chhunga chengte'n an hlut a, an humhalh thiam a pawimawh thu sawiin Minister chuan, "Khualzinte hîp tura pho chhuah leh puanzar pawh a chhunga chengte kutah thui tak a innghat," a ti a; leilung hausakna hmanga khualzinte hîp luh chuan khawtlang hmasawnna a thlen theih thu a sawi.

Tlaizawng Paradise hi January 6-7, 2025 chhungin hman a ni a; chhimtu khualzin 1,000 chuang ziah luh a ni.