Hepatitis-C virus chungchang zirho

Delhi Network of Positive People, International Treatment Preparedness Coalition leh Coalition Plus-te chuan nimin khan Hotel Floria-ah North-East India Regional Hepatitis-C Virus Community Workshop an buatsaih a, Health minister Dr R Lalthangliana'n a hawng.

Health Minister chuan, Mizoramah tlawmngai pawl chak leh ṭangkai tak tak, thawh hlâwk tak tak an tam thu sawiin, Mizorama tlawm­ngai pawl hrang hrangte thawhhonain Hepatitis-C vênnaah rah ṭha a chhuah ngei a beisei thu a sawi. 

Dr R Lalthangliana chuan, Mizoramah National Viral Hepatitis Control Programme (NVHCP) kalpui ṭan a nih thu sawiin, "Hepatitis C leh B veite a thlawn a enkawlna pek te, high risk group-te a thlawna endik te, sorkar damdawi-ina thawktute a thlawna hepatitis B vaccine pekte leh Viral Hepatitis chungchang a inven dan leh enkawl dante zirtirna kalpui a ni," a ti.

Workshop-ah hian Hepatitis-C virus, India leh hmar­chhak state-a a darh mek dan te, enkawl dan leh mipuite hnena NGO kaltlanga inzirtirna hlâwk zawk kalpui dan turte zirho a ni a, Mizoram bakah hmarchhak state aṭangin mi eng emaw zat an tel. Vawiinah chhunzawma zawh a ni ang.