Republic Day lawm a ni

Nimin khan India ram pumah Republic Day vawi 71-na hman a ni a, Mizoramah pawh hmun hrang hrangah hman a ni a, Aizawlah chuan Lammualah governor PS Shreedharan Pillai-in hnam puanzar a pawt pharh a, parade contingent-te endikin, hnam puanzar chibai an bûk a chháng lêt.

Larsap chuan India ramin danpui (constitution) kan neih ṭan ni January 26, 1950 kha kan tan ni ropui leh chhinchhiahtlak a ni kumtluan tawh dawn tih sawiin, "He ni hi sorkar ropui, mipui rorelna sorkar kan neih theihna ni a ni. He ni a lo thlen hian ramin zalenna sualchhuaktute inpekna kan hre rengin, kan zahna kan lantir a ni. Kan mi hmasa, ram danpui lo siamtute khan hmathlir thui tak leh fing tak an nei," a ti.

Constitution chuan ram thar dinna tur atana innghahna thurin a siam a ni satliah mai lo tih sawiin Governor chuan, "Ram khua leh tui/vantlang nun siamthara a lo awm theih nana hmasawnna rahbi an lo sial a ni zawk a ni. Chung hma an lo lakna chu vawiin thleng hian kan chhawr ṭangkai hle," a ti a, kan hnathawh, kan thil tum leh kan hmalakna engkimah kan ram danpui chu min kaihruaitu rinawm a nih chhoh zel thu a sawi.

Governor chuan Mizoram sorkar chu kum khat chuang tluang taka a kal tawh thu sawiin, "He hun chhung hian state intodelh leh chak zawk leh ṭhangduang ni turin kawng hrang hrangah hmalakna siam a ni. Nikum chhung khan economic growth rate/ ei leh bara ṭhanna chu 14.82% niin, India ram state dangte nen khaikhin pawhin a ṭhang chak ber pawl kan ni," a ti.

Kum 2012-2018 chhung khan Mizoram hmasawnna chu chawh­rualin 12.75% a nih thu sawiin Larsap chuan, "Hetiang taka kal tluan hi kan la nei ngai lo a ni. Hetiang ang zela kan kal chho a nih chuan kum 10 chhung chuan retheihna um boin, state intodelh leh sum lakluh inrualkhai tak kan la ni mai ang tih ka ring nghet tlat," a ti a, a hlawhtlinna chu kan zavaia kan ṭanhonaah a innghah thu a sawi.

Governor chuan hmasawn­na chu sector hrang hrangah a innghat tih sawiin, "Hengte hi sorkar hmalakna pui ber SEDP hnuaiah khaikhawm niin Mizoramin hmasawnna tluantling a neih theih nan hengte hi an pawimawh em em a ni. SEDP hnuaiah board 14 din a ni a, board-te hi minister, MLA leh mithiam bikte leh official-te enkawlna hnuaiah kalpui a ni," a ti.

'Larsap sawi danin, SEDP hnuaia din board-te chuan SEDP hmalakna kalpui tura ruat sorkar department 25 hmalakna an enzuiin an kaihruai dawn a ni. SEDP hnuaiah hian Nationl Bamboo Mission nen ṭangkawpin rua chi hnih - Dendrocalamus Latiflorus leh Dendrocalamus Brandisii te chu area expansion scheme-a kalpui ṭan mek a ni. 

Mipuite'n tui in tur thiang­hlim hniang hnar taka an hmuh theihnan sorkar chuan theihtawp a chhuah a, khawpui 23 kan neih zinga khawpui 15 ah tui intur thianghlim hi in tinah pek an ni, reilote chhungin a dang khaw pariatahte pawh hian in tinah tui thlianghlim pek vek beisei a ni. Thingtlang khaw hrang hrang chawm turin water supply scheme 14 siam mek a ni a, kum 2019-2020 chhung hian khaw hrang hrang 228 a chhungkaw 34,797  hnenah tui connection pek tum a ni.

Kan ram chhungah hnam tenau zawk ten thlamuang tak leh hlim taka nitin khawsak an rel hi a pawimawh em em a, heng sakhua leh hnam hrang hrang te tihdan phung leh kalphung te hi kan inzahsak a pawimawhin hun harsa tak tak karah pawh an hnam leh sakhuana vawng him tura theihtawp chhuah an ni tih kan hriatpui a pawimawh a, keini ngei pawh an dinhmuna ding ṭhin kan ni tih i hre reng ang u. 

Industrial sector ti ṭhang turin nasa takin hma lak mek a ni a, chung zingah chuan Mizoram Handloom & Handicraft Corporation Ltd (ZOHANDCO) tuai thar turin ruahmanna kalpui mek a ni. SEDP hnuaiah Industrial Development Board din a ni a, mahni kutke a eizawnna kalpui (entrepreneurs) te kawng hrang hranga ṭanpui turin Entrepreneur Facilitation Centre pawh din a ni.

Mipuiten kham khawp ei tur an hmuh chu sorkar ngaihpawimawh berte zinga mi a ni. Public Distri­bution System  ṭhat avangin state chhung khawiah mah PDS kaltlanga ei tur supply khawpkham lo sawi tur a awm lo. LPG cylinder kan mamawh ang tawk suply a nih theih nan hmalak mek a ni a, hemi kaihhnawih hian Bairabiah LPG Bottling Plant siam hna ṭan ṭep a ni.

Governor hian nikuma President's Police Medal for Distinguished Service dawngtu mi pahnih, Police Medal for Meritourious Service dawngtu mi pahnih leh Governor's Medal dawngtu mi pathum hnenah lawmman a hlan a ni.

Lammuala Republic Day lawm­naah hian parade contingent 30 an tel a, commander chu 5th IR asst. com­mandant CS Lalrinzuala niin, second commander chu CID (Crime) dy. SP C Lalmalsawma. Parade contin­gent-te chu armed contingent pariat, unarmed contingent pali, school contingent 14 leh pipe band pali an ni.

Republic Day lawmnaah hian chief minister Zoram­thanga, Assembly speaker Lalrinliana Sailo, minister te, MLA-te leh sorkar leh sipai hotu eng emaw zat leh zirlai ṭhahnem tak an tel.