EPIP, Lengte hmunhma enfiah

Nimin khan Commerce & Industries (CI) minister F Rodingliana hoin CI department, Land Revenue & Settlement department, PWD leh Power & Electricity department hotuten Lengtea Export Promotion & Industrial Park (EPIP) an tlawh a; industrial area tihchangtlunna tura hmalakna leh industry dah dan turte an endik.

Lengtea EPIP hi industry dinna turin kum 2003 khan ruahman a ni a; Industrial Park siamna atan mimal ram 155 lâk niin, a hmun zau zawng chu bigha 1,390.22 a ni. A hmunhma zirchianna geographic information system (GIS) mapping leh a ramri teh (re-plotting) hna kalpui zawh a ni tawh a, chumi zûlzui chuan industry hrang hrang dah (allocate) tur a ni.

Sorkar hotute'n nimina Lengte an tlawhnaah hian, industry dinna tura ram lâk tawh chhungah mi ṭhenkhat chuan hmun eng emaw zat an la enkawl zui thu sawi a ni a; Mizorama industry tihhmasawn nana ruahmanna awmte sâwt zawka kalpui a nih theih nan dan loa ram la enkawl zui luite pass chu rang taka cancel a ṭul thu an sawi bawk.