Excise Dept-in kum 2025 chhungin heroin kg 45, zu lt. 91,294 an man

Excise & Narcotics department (END) chuan kum 2025 chhung khan heroin kg 45.341 leh methamphetamine kg 298.973 bakah, rakzu leh sapzu litre 91,294.352 an man.

END hotute chuan nimin khan an Commissionerate conference hall-ah Case Review Meeting an nei a; END commissioner Z Lalhmangaiha'n kaihruaiin, senior officer-te leh district hrang hrang awptu assistant commissioner-te leh officer in-charge-te an tel.

Review meeting-a tarlan danin, END hian kum 2025 chhung khan damdawi ruihhlo (narcotic drug)-ah heroin kg 45.341, methamphetamine kg 298.973 leh crystal meth kg 48.061 an man a; ganja kg 226.607, opium kg 1.193, khuh damdawi phial 9,466, alprazolam mûm 34,300, nitrazepam mûm 9,429 leh tramadolmûm 6,390 an man bawk.

Zu lamah chuan, rakzu litre 70,178.607 an man a, sapzu - IMFL (Indian made foreign liquor) litre 20,968.495 leh FML (foreign made liquor) litre 147.250 an man a; BEDC (Burma zu) litre 3,054.570 an man.

Zu siamna dawidim kg 278.940, zu bilh lai ṭín 1,38,588 leh zu siamna bêl 2,902 an man a; beer litre 23,292.020 leh SOJU litre 413.280 an man bawk.