KHAWTHLIR

Cheng nuai 10 hlan

USA-a Chin Baptist Church (CBC) Women's department hruaitute chu nimin khan Central YMA pisaah an lêng a, CYMA hruaitute nen an inkâwm a, YMA-in ruihhlo a donaa hman turin Rs 10,00,000 an hlan. CBC Women's department hian CYMA-in ruihhlo a dona atan kum 2023 aṭang khan thla tin US dollar 1,000 an pe ṭhin a, nimina an pek hi kum 2026 chhung atana an pek a ni.

'Mizo Lalnute'

Lalhmachhuana Zofa ziah 'Mizo Lalnute' tih lehkhabu chu nimin khan Lalthara, IAS (Rtd)-in NECS Conference Centre-ah a tlangzarh. Tlangzarhtu Lalthara hi Mizo Cultural Organisation chuan chawimawina an hlan nghal a ni.

MLA-in infiamna hmunhma a hawng

Lunglei HPC vice chairman V Malsawmtluanga, MLA chuan nimin khan a bial chhung - Serkawn, Zotlang leh Pukpuia PMJVK 2020-21 kaltlanga sak basketball court, volleyball court leh futsal ground te a hawng. Innfiamna hmunhma hawnte hi cheng nuai 596.91 sênga siam a ni. V Malsawmtluanga chuan, sorkar hmasate hmalakna sorkar tharin a chhunzawm aṭangin hlawhtlinna a lan chhuah thu a sawi a, infiamna hmunhmate chu dimdawi leh uluk taka hmana enkawl a nih theih nan khauh taka hma la turin local council-te a chah.

Kuhva lakluh khap

Hnahthial district magistrate K Vanlalruati chuan thupek chhuahin, Hnahthial district-ah dan loa kuhva lak luh leh hralh khap a nih thu a puang a; thupek zâwm lote chu BNS 2023 Section 223 hmanga hrem theih an nih thu a tarlang.

Kângmei vên dan tur ngaihtuah

Lawngtlai District Committee on Fire Prevention chu nimin khan chairman Donny Lalruatsanga, bawrhsap hoin an ṭhu a, kumina kângmei vennaa hmalak dan tur an rel. Loneitute'n sorkar hun tiam (March 15) ral hma ngeiin an lo/huan hâl se, khaw tinah 'fire line' mumal tak siam ni se, an ti.