Serchhip district-a NH kawngpui thawm ṭhat dan tur sawiho

Serchhip district bawrhsap Paul L Khuma chuan January 8, Ningani khan a pisaah NHIDCL hnuaia contractor-te a ko khawm a, National Highway-02 thawm ṭhat dan tur a sawipui. February 12, 2026 ral hmain Baktawng - Keiṭum thleng kawngpui thawm ṭhat hman ni se an ti.

Serchhip tan tlangtu NH-02 laih thar chu a siamtu contractor-te kutah enkawl zui hna (maintenance & repair) a la awm a; kum 2025 fûr zawh hnuah kawng chhia, bal leh khuar eng emaw zat a awm avangin thawm ṭhat mek a ni.

Hetih lai hian, ṭhutkhawm hmasaa rêl tawh, Baktawng leh Serchhip inkar kawngpui 2025 Krismas hmaa siam zo tura tih chu siam zawh a ni lo. Contractor-te chuan, bungraw lakna hmunpuiah harsatna an tawh avang leh khawl chhia avangin an zo thei lo niin an sawi.

Ṭhutkhawmah hian ruahmanna thar siam a ni a, February 12, 2026 ral hmain Baktawng aṭanga Keiṭum thleng kawngpui thawm ṭhat hman ni se, an ti. February 28, 2026-ah by-pass road siam hman turin an ti bawk.

Paul L Khuma chuan, contractor-te chu an inhuam ang ngeia hun ruat chhunga kawng thawm ṭha zo hman turin a hrilh a; DC office aṭangin hna an thawh dan en zui reng a nih dawn thu a sawi.