Ruihhlo donaah ṭan lak zual a ṭul

Excise & Narcotics minister Lalnghinglova Hmar hoin nimin khan Saituala END station-ah kum thar puala inhlanna hun hman a ni a; Minister chuan, Saitual chu khualzin tam takin an paltlang ṭhin a ni a, khualzin tamin ruihhlo a ken tel ṭhin avangin ruihhlo donaah ṭan lak zual a ṭul thu a sawi.

Lalnghinglova Hmar chuan, Saituala Excise & Narcotics station chu kum khat chauha upa ni mah se hmasawnna tam tak hmuh tur a awm tih a sawi a, "Saitual hi Manipur aṭanga ruihhlo lak luhna kalkawng a ni. Tourism lamah pawh hmasawn zelin Tlaizawng Paradise Phuaibuangah hlawhtling taka neih a ni a, Ṭamdil leh tlâng mawi tak tak tlawhtute pawh an pung zel. Hengte hi a lawmawm rualin, khualzin tam hian ruihhlo a ken tel ṭhin avangin ṭan lak zual zel a ngai a ni," a ti.

Excise & Narcotics department chuan thawktu indaih lo tak chungin theihtawp chhuahin hna an thawk ṭhin tih sawiin Minister chuan, "Saitual district pawh assistant commissioner-in a ho tawh dawn," a ti a; khawtlang hruaitute nen thawhhona ṭha tak nei a, ruihhlo do kawnga theihtawp chhuah zel turin thawktute a chah.

Inkhawm hi END joint commissioner Peter Zohmingthanga'n a kaihruai a, sorkar hotu te, khawtlang leh tlawmngai pawl hruaitute an tel.

Saituala Excise & Narcotics station-ah hian thawktu pakua an awm a; MHIP leh Sub-Hqrs YMA kumpuante nen ṭanghoin counselling board din a ni a, ruihhlo kaihhnawiha an mante hnenah counselling pek ṭhin a ni.