Taiwan team-te Mizoram an rawn zin; An rama hna thawk tur rawn ngaihven

India-Taiwan Labor Mobility Agreement 2024 hnuaia a hmasa ber/pilot atan Mizo ṭhalaite Taiwan-a hna thawk tura hmalakna chungchangah Taiwan Labor Ministry-a Vice Minister, India rama Taiwan Ambassador leh official dangte chuan January 9, 2026 khan Aizawl an rawn thleng a; Taiwan rama hna thawk thei tur an ngaihven a ni.

Taiwan team hi mi 10 an ni a, January 9 tlai khan Mizoram Youth Commission (MYC) pisaah thil pawimawhte sawipui niin, MYC chairman Malsawmzuala Ralte leh OSD to CM Jonathan Lalremruata ten an ho.

Taiwan sorkar aiawhte chuan, Taiwan ram leh Taiwan mite chu Mizoram leh Mizote nen ram hmelhmang, ei leh in, hmel, hnam lâm leh nunphungah an inang hle tih an sawi a, "Taiwan-a awm ang maiin kan tlangnêl. Mizo ṭhalaite pawhin Taiwwn nuam an tih ve ngei kan beisei," a ti.

Taiwan team hian chief minister Lalduhoma leh chief secretary Khilli Ram Meena te pawh an chenna banglaah an kâwm a; Mizo ṭhalai Taiwan rama hna thawk tur thawn bakah, rikrum thil leh chhiatna hmachhawnna, agriculture/horticulture, badminton, solar leh electronics lamah thawhho zel ni se, an ti.

Taiwan rama hna thawk duh Mizo 300 chuangin MYC-ah dilna an thehlut tawh a, a thawh khatna chu March 2026-a chhunga tifel hman tura ruahman niin, manufacturing industry-a thawk tur an ni.

MYC hian Taiwan Economic & Cultural Centre nena ṭang dunin Mizo ṭhalai Taiwan rama hna thawka kal turte pualin training hrang hrang MYC office-ah buatsaih an tum a ni.